Fýtboldan Qazaqstan jáne Ózbekstan quramalary joldastyq kezdesý ótkizedi
ASTANA. QazAqparat - Fýtboldan Qazaqstan jáne Ózbekstan quramalary qarasha aıynda joldastyq kezdesý ótkizedi, dep habarlaıdy QazAqparat tilshisi.
Bul jóninde Qazaqstan fýtbol federatsııasy men Ózbekstan fýtbol qaýymdastyǵy ózara kelisimge keldi.
Kezdesý 2022 jyldyń 16 qarasha kúni Tashkent qalasyndaǵy «Pahtakor» stadıonynda ótkiziledi.
Joldastyq kezdesý jaıynda Qazaqstan ulttyq quramasynyń bas bapkeri Magomed Adıev pikir bildirdi.
«Ózbekstan quramasy Eýro-2024 irikteý kezeńine daıyndyq úshin jaqsy qarsylas dep sanaımyn. Jattyqtyrýshylar shtaby úshin kóp málimet jınaýǵa múmkindik beredi. Ózbekstanda sapaly fýtbolshylar kóp. Sol sebepti osy oıynda Eýropa chempıonatynyń aldaǵy irikteý kezeńinde úmit artatyn fýtbolshylardy bir tekserip alamyn dep oılaımyn. Óte qyzyqty oıyn bolady dep úmittenemin», - dedi ol.
Aıta ketsek, eki eldiń quramalary buǵan deıin alty ret sheberlik baıqasty.
Onyń ekeýinde Ózbekstan jeńiske jetse, biride Qazaqstan basym tústi. Al úsh oıyn teń aıaqtaldy.
FIFA reıtınginde Ózbekstan quramasy 77-orynda tursa, Qazaqstan 113-orynda keledi.
Foto: kff.kz
