Fýtboldan Qazaqstan ulttyq quramasy joldastyq matchtarǵa daıyndalyp jatyr

ASTANA. KAZINFORM – Qazaqstan ulttyq quramasy Armenııa jáne Ázerbaıjanǵa qarsy ótetin joldastyq matchtarǵa daıyndyǵyn bastap ketti. Oqý-jattyǵý jıyny Almaty qalasynyń Ortalyq stadıonynda ótip jatyr.

Aıta keteıik, aldaǵy qos oıynǵa komandany bas bapkerdiń kómekshisi Rýslan Baltıev bastap shyǵady. Stanıslav Cherchesov bastaǵan jańa bapkerler shtaby joldastyq matchtar aıaqtalǵan soń jumysyna kirisedi.

Aıtpaqshy, Qazaqstan ulttyq quramasy sapynda ózgerisbar. Tize jaraqatyn alǵan Ádilhan Dobaıdyń ornyna «Elimaıdyń» oıynshysy Mıhaıl Gabyshev shaqyrtý aldy.

«Sondaı-aq ulttyq quramaǵa Islam Chesnokov (aıaq jaraqaty), Aleksandr Zýev pen Bekhan Shaızada (ekeýinde de JRVI) kómektese almaıdy. OJJ barysynda úshinshi qaqpashy retinde Danıl Ýstımenko jattyǵady. Al shabýylshy Ivan Svırıdov Grýzııa U-21 quramasymen joldastyq match ótkizetin Qazaqstan U-21 quramasynyń sapyna qosyldy», - delingen Qazaqstan fýtbol federatsııasy taratqan resmı aqparatta.

Esterińizge sala keteıik, Qazaqstan ulttyq quramasy syrt alańda eki joldastyq match ótkizedi. 7 maýsymda ulttyq qurama Armenııamen kezdesedi. Oıyn Erevan qalasyndaǵy V.Sarkısıan atyndaǵy Respýblıkalyq stadıonda ótedi. Bastalýy: Astana ýaqytymen saǵat 21:00-de.

Tórt kúnnen keıin bizdiń qurama Ázerbaıjanǵa qarsy match ótkizý úshin Vengrııaǵa jolǵa shyǵady. Oıyn Sombatheı qalasynda «Haladash» stadıonynda ótedi dep josparlanǵan. Bastalýy: Astana ýaqytymen saǵat 21:00-de.