Fýtboldan Qazaqstan U-19 quramasy Eýropa chempıonaty elıtalyq kezeńinde Ýkraınadan jeńildi
ASTANA. KAZINFORM - 2026 jylǵy Eýropa chempıonatyna irikteýdiń elıtalyq kezeńindegi ekinshi kezdesýinde Qazaqstan 19 jasqa deıingi jasóspirimder quramasy Ýkraınaǵa ese jiberdi.
Qazaqstandyq fýtbolshylar besinshi topta synǵa túsip jatyr. Qarsylastary - Ýkraına, Rýmynııa jáne Soltústik Irlandııa.
Otandastarymyz alǵashqy kezdesýde Rýmynııany 2:0 esebimen jeńip, fınaldyq kezeńge shyǵýǵa múmkindigin arttyra túsken edi. Degenmen bul joly olar jankúıer kóńilinen shyǵatyn kórsetkishke qol jetkize alǵan joq.
Búgingi oıyn barysynda olar qarsylasyna 0:3 esebimen jeńilip, qurlyqtyq dodanyń kelesi kezeńine shyǵýdan shet qalyp qoıdy.
Endi olar 31 naýryzda Soltústik Irlandııaǵa qarsy oıyn ótkizedi.
Іrikteý kezeńiniń matchtary 2026 jyldyń 25-31 naýryzy aralyǵynda Rýmynııada ótedi. Ár toptyń jeńimpazy 2026 jyldyń 28 maýsymy men 11 shildesi aralyǵynda Ýelste ótetin Eýropa chempıonatynyń fınaldyq kezeńine joldama alady.
Aıta ketsek, Qazaqstan U-19 jasóspirimder quramasy ekinshi irikteý kezeńinde Irlandııany 1:0 esebimen jeńip, Kıprmen 1:1 esebimen teń tússe, Nıderlandqa 1:2 esebimen ese jiberdi.
Nátıjesinde óz tobynda ekinshi orynǵa taban tirep, elıtalyq kezeńge joldama alǵan edi.
Sondaı-aq búgin elimizdiń 17 jasqa deıingi jasóspirimder quramasy Danııaǵa 0:3 esebimen ese jiberdi.
Olar budan buryn Aýstrııamen 0:0 esebimen teń tústi. Endi otandastarymyz 31 naýryzda Chehııamen sheberlik baıqasady.
Eske salsaq, olar Horvatııada fýtboldan 17 jasqa deıingiler arasynda ótken ekinshi irikteý kezeńinde Qazaqstan quramasy óz tobynda birinshi orynǵa ıe bolyp, elıtalyq kezeńge shyqqan edi.
