Fýtboldan Qazaqstan U-16 quramasy UEFA Damý kýbogyn jeńispen bastady
ASTANA. KAZINFORM - Shymkent qalasynda ótip jatqan týrnırde otandastarymyz alǵashqy oıynda Pákistan U-16 quramasymen kezdesti.
Oıynnyń alǵashqy mınýtynan qazaqstandyq fýtbolshylar basymdyqqa ıe boldy. Oıynnyń 7-shi mınýtynda Platon Shıpıtsın penaltıden esep ashty. Shabýyl men qorǵanysty qatar ushtastyrǵan Qazaqstan quramasy birinshi kezeńde Pákistan qaqpasyna taǵy úsh gol soǵyp, aıqyn basymdyqqa qol jetkizdi. Ánýar Tólendi, Davıd Zarechnyı men Danııar Qası kózge tústi.
Ekinshi taımnyń 88-shi mınýtynda Pákistan quramasynyń oıynshysy bir gol salyp esepti qysqartty. Otandastarymyz kezdesý barysynda 4:1 esebimen jeńiske jetti.
Endi olar aldaǵy oıynyn 27 sáýir kúni 15:30-da Ázerbaıjan quramasyna qarsy ótkizedi.
2026 jyldyń sáýir aıynyń sońy men mamyr aıynyń basynda Shymkent pen Talǵar qalalarynda uldar men qyzdar arasynda UEFA Damý týrnıriniń matchtary ótedi.
Aıta ketsek, bul týrnır – bul jasóspirimder quramalaryna arnalǵan, oıyn tájirıbesin jınaqtaýǵa jáne jas fýtbolshylardyń sheberligin shyńdaýǵa baǵyttalǵan halyqaralyq báseke.
Qysqa merzimdi týrnır aıasynda komandalar resmı jarystarǵa barynsha jaqyn jaǵdaıda birneshe match ótkizedi. Bul oıynshylarǵa halyqaralyq deńgeıge beıimdelýge jáne Eýropa chempıonattaryna daıyndalýǵa kómektesedi.
UEFA osyndaı týrnırlerdi ótkizýdi Qazaqstan fýtbol federatsııasyna birinshi ret senip tapsyryp otyrǵan joq. Shymkentte Qazaqstan, Reseı, Ázerbaıjan jáne Pákistan quramalarynyń qatysýymen uldar (U-16) arasyndaǵy matchtar ótedi. Talǵarda Qazaqstan, Izraıl, Estonııa jáne Ózbekstan quramalary baq synaıtyn qyzdar (U-16) arasyndaǵy týrnır uıymdastyrylady.
Eske salsaq, FIFA bıylǵy ÁCh matchtary bıletteriniń jańa partııasyn satylymǵa shyǵardy.
