Fýtboldan Qazaqstan sýperkýbogy: «Tobyl» fınalda «Astanamen» kezdesedi
NUR-SULTAN. QazAqparat - Búgin, 2 naýryzda fýtboldan 2021 jylǵy sýperkýbogynda fınalǵa shyqqan taǵy bir komanda anyqtaldy, dep habarlaıdy QazAqparat tilshisi.
Búgin jartylaı fınalda Qostanaıdyń «Tobyly» men Almatynyń «Qaıraty» kezdesti. Oıyn tartysty ótti deýge negiz bar. Komandalar negizinen shabýylǵa jıi shyǵyp jatty.
Esepti 9-mınýtta «Tobyl» oıynshysy Ashat Taǵybergen ashty. Oıynnyń 40-mınýtta «Qaırat» sapynan Neboısha Kosovıch tarazy basyn teńestirip ketti.
Ekinshi kezeńniń 67-mınýtynda almatylyq Artýr Shýshenachev óz komandasyn alǵa shyǵardy. Budan keıin qostanaılyq klýb sapynan Sergeı Malyı 73, Serikjan Mýjıkov 75-mınýttarda mergendik tanytty. Al 90-mınýtta almatylyq klýb fýtbolshysy Gúljigit Alyqulov gol soǵyp, qaıtadan tarazy basy teńesti. Negizgi kezeń 3:3 esebimen teń aıaqtalyp, kezdesý penaltı tebýge ulasty. Bul joly «Tobyldyń» mereıi ústem bolyp, qostanaılyq klýb fınalǵa shyqty.
Esterińizge sala ketelik, budan buryn «Astana» fınalǵa shyqty.
Úshinshi oryn úshin saıys 5 naýryzda bolsa, fınal 6 naýryzǵa belgilengen.
Aıta keteıik, atalǵan dop dodasy Túrkistan qalasyndaǵy «Túrkistan-arena» stadıonynda ótýde.
Atalǵan týrnırdiń júlde qory 40 mıllıon teńge. Ol jeńimpaz jáne júldeli oryndarǵa qol jetkizgen komandalarǵa beriledi.
