Fýtboldan Qazaqstan sýperkýbogi: «Tobyl» jeńimpaz atandy
NUR-SULTAN. QazAqparat - Búgin, 6 naýryzda fýtboldan 2021 jylǵy sýperkýboktiń jeńimpazy anyqtaldy, dep habarlaıdy QazAqparat tilshisi.
Túrkistan qalasyndaǵy «Túrkistan-arena» stadıonynda ótken fınalda Qostanaıdyń «Tobyl» jáne elordalyq «Astana» komandalary kezdesti.
Esterińizge sala ketelik, jartylaı fınalda «Astana» qaraǵandylyq «Shahterden» 2:1 esebimen basym tústi. Al «Tobyl» Almatynyń «Qaıratymen» negizgi kezeńde 3:3 esebimen teń oınap, penaltıde orta jolda qaldyryp ketti.
Búgingi kezdesýde qos komanda da oıyn basynan shabýylǵa ıek artty. Bir-biriniń qaqpasy mańynan jıi boı kórsetti. Osyndaı sátterdiń birinde «Tobyl» fýtbolshysy Sergeı Malyı 14-mınýtta elordalyq komanda qaqpasyna gol soǵyp ketti. Oıynnyń 90-mınýtynda Marın Tomasov aıyp dobynan tarazy basyn teńestirdi.
Negizgi kezeń 1:1 esebimen teń túsip, penaltı tebýde «Tobyl» múlt ketken joq. Osylaısha qostanaılyq klýb Qazaqstan sýperkýboginiń bıylǵy ıegeri atandy. Óz tarıhynda «Tobyl» tuńǵysh ret osyndaı tabysqa kenelip otyr.
Búgingi kúnge deıin sýperkýbokte el chempıony men kýbok ıegeri sheberlik baıqasty. Fınalda toǵyz komanda baq synaǵan. Olardyń arasynda «Astana» segiz márte fınalda oınap, bes márte (2011, 2015, 2018, 2019, 2020) kýbokti ıelendi. Odan keıingi kezekte Almatynyń «Qaıraty» 5 márte fınalda baq synap, úsheýinde (2016, 2017) jeńimpaz atandy. Al «Aqtóbe» 2 (2008, 2010), «Elimaı» (1995), «Ordabasy» (2012), «Shahter» (2013) komandalary bir-birden jeńimpaz tuǵyrynan kórindi.
Aıta keteıik, 13 naýryzda fýtboldan Premer-lıga komandalary el birinshiligi jalaýyn kóteredi.
Foto: pflk.kz
