Fýtboldan Qazaqstan premer-lıgasynyń 26-nshy týr oıyndary aıaqtaldy

Premer-lıganyń bitýine 7-týr qalǵanda týrnır kestesiniń kóshbasshysy «Tobyl» men onyń izin basýshy «Aqtóbeniń» arasyndaǵy upaı aıyrmasy 7-ge azaıdy.

Vladımır Muqanov shákirtteri barlyq jaǵdaıdy túsine otyryp, endigi kezikken qarsylastyń barlyǵyn utýǵa bet alǵan sekildi. Keshe olar Aqtóbede azýly komanda «Ertispen» ótken oıynda Asylan Darabaevtyń nátıjeli soqqysynyń arqasynda 1:0 esebimen jeńiske jetti.

Ravıl Sabıtov baptaıtyn «Tobyl» osy týrda óz alańynda «Shahtermen» (Lotov 31 (1:0), Fınonchenko 88 (1:1)) teń oınasa da budan burynǵy kezdesýlerde jınaǵan 54 upaıy ázirge eshkimge shań ilestirer emes. Sonymen qatar, negizgi oıynshylardyń barlyǵy óz babynda, jasyl alańǵa shyǵýǵa daıyn.

Al komanda tiregi - Andreı Fınonchenkonyń alańǵa qaıta oralýymen gol urýdy jalǵastyrǵan «Shahter» joǵaltyp alǵan jaǵdaıyn ornyna keltirýge talpynýda. Jalpy esepte 39 upaımen 6-nshy orynǵa turaqtaǵan qaraǵandylyqtar «Atyraýdan» 2 upaı qalyp tur.

«Ertistiń» syrt alańda «Aqtóbege» utylǵanyn ońtaıly paıdalana bilgen «Lokomotıv» «Atyraýmen» (esep 0:0) teń túsip, úshinshi orynǵa shyqty. Holger Fah shákirtteriniń jınaǵan upaı sany komandaǵa budan ári kóterilýge múmkindik bermeıdi. Pavlodarlyq «Ertistiń» aldyn oraǵaly turǵan Astanalyqtar osy qarqynyn joǵaltpasa, bıyl qola júldege qol jetkizgeli otyr.

Óz alańdarynda «Tarazdy» qabyldaǵan «Jetisýlyqtar» 2:3 esebimen qonaqtarǵa jol berse de týrnır kestesinde qarsylastarynan 10 upaı ozyq tur.

Týrnırdiń tómengi bóligindegi jaǵdaıdy aıtsaq, aldymen «Oqjetpestiń» negizgi básekelesi «Aqjaıyqty» utqany Kókshetaýlyq jankúıer qaýymǵa senim syılady. «Oqjetpestiń» alańynda ótken tartysty oıynda kókshetaýlyq qorǵaýshy Maksım Chýdınov oıynda soǵylǵan jalǵyz doptyń ıesi atanǵan bolatyn. Keler jylǵy birinshilikti tómengi lıgada ótkizbes úshin jantalasyp jatqan sońǵy oryndardaǵy úsh ujymnyń bireýi ǵana óz ornyn saqtap qalmaq. Bul oraıda almatylyq «Qaırattyń» ózge qarjylaı jáne basqa máseleleri jónge kelgenimen, komanda oıyny ázirge órge basar emes. Sondyqtan «Qaırattan» buryn oraldyq «Aqjaıyq» klýbynyń múmkindigi molyraq. Andreı Chernyshevtyń komandasynyń sońǵy oıynda «Oqjetpeske» ese jibergenimen (esep 0:1), sońǵy úsh klýbtyń aldynda turýy premer-lıgadaǵy ǵumyryn kem degende taǵy bir jylǵa uzartýǵa jaǵdaı jasaıdy.

Sonymen, 26-nshy týr qorytyndysy boıynsha, aldyńǵy úshtikti «Tobyl»(54 upaı), «Aqtóbe»(47), «Lokomotıv»(44) qorytyndylap tur. Onan keıingi oryndardy «Ertis» (43), «Atyraý»(41), «Shahter»(39) ıelengen. Al «Ordabasy»(39), «Jetisý»(38), «Taraz»(28) komandalary sáıkesinshe 7-8-9-nshy oryndarǵa turaqtaǵan. Jalpy kestedegi aýtsaıderler qatarynda bıyl «Aqjaıyq»(20), «Qaırat»(20) jáne «Oqjetpes»(18) komandalary ornalasqan.

Sońǵy týrdan keıingi esepteý boıynsha, surmengen bolyp «Tobyl» shabýylshysy Ulyqbek Baqaev 14 golmen top bastap tur. Onan keıinNurbol Jumasqalıev enshisinde 12 gol jáne «Ertis» shabýylshysy Georgıı Daskalovta 10 gol.