Fýtboldan Qazaqstan Premer-lıgasy: «Qaırat» jetinshi jeńisine jetti
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan chempıonatynyń segizinshi týrynda sońǵy eki oıyn ótti, dep habarlaıdy QazAqparat tilshisi.
Aldymen, Qostanaıdyń «Tobyl» jáne Petropavldyń «Qyzyljar» komandasy kezdesti. Oıyn barysynda qostanaılyq klýb sapynan Dmıtrıı Mıroshnıchenko - 35, Azat Nurǵalıev 49-mınýttarda gol soqty. Oıynda «Tobyl» 2:0 esebimen jeńiske jetti.
Sońǵy kezdesýde Almatynyń «Qaıraty» men Qyzylordanyń «Qaısar» komandalary jasyl alańǵa shyqty. Kósh basynda kele jatqan eki komanda arasyndaǵy tartys qyzyqty órbidi. Birinshi kezeńniń 44-mınýtynda «Qaısar» sapynan Elgýdja Lobjanıdze gol soǵyp ketti. Oǵan 71-mınýtta almatylyq Aıbol Ábiken bir golmen jaýap qaıyrdy. Al 90-mınýtta Aderınsola Eseola jeńis golyn soǵyp ketti. Osylaısha «Qaırat» 2:1 esebimen jeńiske jetti. Bul - almatylyq klýbtyń bıylǵy dop dodasyndaǵy jetinshi jeńisi. Aıta keteıik, eki komanda da 17 qyrkúıekte Eýropa lıgasynda elimizdiń namysyn qorǵaıdy.
Eske salaıyq, keshe segizinshi týrdaǵy eki oıyn ótkizildi. Bul kúni «Jetisý» «Oqjetpesti» 1:0 esebimen basym tússe, «Shahter» men «Taraz» 1:1 esebimen tarqasty.
Búgin «Astana» «Ordabasyny» eki penaltımen 2:1 esebimen jeńip ketti.
Endi toǵyzynshy týr oıyndary 18, 19, 20 qyrkúıek kúnderi ótkiziledi.
