Fýtboldan Qazaqstan premer-lıgasy birinshi kezeńiniń nátıjeleri

Astana fýtbol federatsııasy kezeń qorytyndysyn jasady.

"Ordabasy" - "Astana" - 3:0. «Ordabasy» el chempıonyn "oısyrata jeńedi" dep eshkim de oılamaǵan shyǵar. Ońtústikqazaqstandyqtar tyrysty, jankeshtilik tanytty. Jeńiske laıyq oıyn órnegin kórsetti. Qarsylastarynan basym tústi. «Astana» bolsa áli gol soǵa alar emes. Sýperkýbok pen birinshi týrda, ıaǵnı eki oıynda 0:5 esebimen utyldy. Oıyn órnekterinen, qımyl-qozǵalystarynan selsoqtyq baıqalady. Shymkenttegi matchtan keıin bas bapkeri Stanımır Stoılov aıtqandaı, másele oıyn nátıjesinde emes, másele odan da tereńde sııaqty. «Astananyń» búginde qarajattan qıyndyq kórip júrgeni "uzyn qulaq" arqyly jankúıerler arasynda jeldeı esip júr.  

"Qaırat" - "Aqtóbe" - 1:0. «Qaırat» óz alańynda jeńiske jetip, úsh upaı enshiledi. «Aqtóbe» maýsym aralyǵynda birneshe transferlerimen kópshilikti elitip edi. Ári matchtyń aldynda Almatyǵa jeńilý úshin bara jatpaǵandaryn aıtyp, odan ári qyzyqtyra túsken. Biraq Alataý bókterinde fýtbol jankúıerleri men mamandary súısinerlikteı oıyn órnegin kórsete almady. Jańadan jasaqtalǵan komanda, áli bir-birin túsinise almaı júrgendeı. Tek qaqpashysy janyn salyp oınady, gol jibermeýge tyrysty. Óıtkeni ol byltyr «Qaırat» sapynda bolǵan. Alaıda, Sıdelnıkov qansha tyrysqanymen, bir ret san soǵyp qaldy. Biraq áli eki múmkindigi bar.

"Tobyl" - "Atyraý" - 3:0. «Tobyldyń» jeńetindigine shúbá keltirmegender kóp bolǵan shyǵar. Biraq, týra osylaı kúırete jeńedi dep kim oılaǵan. Quramyn ájeptáýir nyǵaıtty. Tipti Qazaqstan jáne Lıtva quramalarynyń keıbir oıynshylaryna negizgi quramda oryn tabylmaı qaldy. Shabýylshysy Alekseı Şetkın jarady. Úsh gol soqty. «Atyraý» bıyl quramyn tolyqtaı derlik jańartty. Bas bapkeri de aýysty. Qostanaıda byltyrǵy quramynan bir-aq oıynshy negizgi quramda alańǵa shyqty (Altynbek Saparov).

"Ertis" - "Aqjaıyq" - 2:1. «Ertis» te komandasyn bıyl qaıtadan jasaqtaýǵa májbúr boldy. Biraq bas bapkeri - byltyrǵy maman. Biraq komanda óz áleýetin áli tolyq kórsetken joq. «Aqjaıyq» - byltyrdan beri "óz" qaqpashysyn tappaı júr. Ótken maýsymda tórt qaqpashyǵa senim artyp kórdi. Bıyl premer-lıgada dop tebý buıyrmaǵan «Altaıdan» Vıacheslav Kotlıardy aldy. Biraq ol eki gol jiberip aldy. Alaıda, ekeýi de - toıtarý múmkin emes soqqylar. Bireýi Aslan Darabaevtyń pármendi soqqysy, ekinshisi - penaltı. Jalpy, «Aqjaıyq» erke Ertis jaǵasynda jaman oınaǵan joq. Jeńisti qoldan bermeı, taıtalasyp baqty. Quramyna bıyl qosylǵan legıonerleri qazaq dodasyna áli úırenisip kete almaı júrgendeı.

"Qaısar" - "Oqjetpes" - 1:0. Premer-lıgaǵa qaıta oralǵan «Qaısar» birinshi týrda jeńiske jetti. Jalǵyz goldy penaltıden soqsa da, jeńiske degen jigerlikteri basymyraq boldy. Sońǵy sekýndtarǵa deıin tizginderin tartqan joq. Al «Oqjetpes» kerisinshe, sońǵy sekýndtarda «osymen oıyn bitti» dep, bir upaıdy qanaǵat tutyp, qarqyndaryn sál de bolsa, báseńsitip alǵandaı. Árıne, sońǵy sekýndtarda bir upaıdan aıyrylyp qalý ońaı emes. Bir kóńil aýdararlyǵy, Kókshe klýby maýsym aralyǵynda quramyn sonshalyqty kúsheıte almaǵandaı.

"Taraz" - "Shahter" - 0:0. Bul oıynda alań ıeleriniń emes, qonaqtardyń jeńiske jetetin múmkindigi basymdaý bolǵan edi. Sebebi, ekinshi taımnyń basynda «Tarazdyń» bir oıynshysy (Ergashev) tym dóreki oınaǵany úshin alańnan qýyldy. «Shahter» 40 mınýt artyq quramda oınady. Biraq jeńisti julyp ala almady.