Fýtboldan Qazaqstan men Vengrııa quramalarynyń kezdesýi qaıda ótedi

ASTANA. KAZINFORM - Fýtboldan Qazaqstan men Vengrııa quramalarynyń joldastyq kezdesýi ótetin oryn ózgerdi.

Bul jóninde Qazaqstan fýtbol federatsııasy málim etti.

Alǵashqyda atalǵan oıyndy Túrkistan qalasynda ótkizý josparlanǵan edi. Qazaqstan jáne Vengrııa fýtbol federatsııalarynyń kelisimimen endi ol Debretsen qalasyna aýystyryldy. Oıyn 9 maýsymda «Naderdeı» stadıonynda ótedi.

Osylaısha maýsymdaǵy halyqaralyq úziliste Qazaqstan quramasy syrt alańda eki match ótkizedi. Aldymen 6 maýsymda Erevan qalasynda Armenııa quramasyna qarsy oınasa, 9 maýsymda Debretsen qalasynda Vengrııa quramasymen sheberlik baıqasady.

Aıta ketsek, budan buryn fýtboldan Qazaqstan quramasy Astanadaǵy týrnırge daıyndyǵyn bastady

Otandastarymyz halyqaralyq fýtbol federatsııasynyń (FIFA) ulttyq quramalarǵa arnalǵan jańa formattaǵy FIFA Series týrnıriniń Astanada ótetin oıyndarynda baq synaıdy.

Alǵashqyda oǵan Qazaqstan, Namıbııa, Komor araldary jáne Kýveıt qatysady dep josparlanǵan edi. Endi Kýveıttiń bas tartýyna baılanysty oıyndardy aınalmaly júıe boıynsha ótkizýge sheshim qabyldandy.

Aldymen qazaqstandyq fýtbolshylar 25 naýryzda Namıbııamen sheberlik baıqassa, 31 naýryzda Komor araldarymen jasyl alańǵa shyǵady.

Al 28 naýryzda Namıbııa men Komor araldary jasyl alańǵa shyǵady.