Fýtboldan Qazaqstan men Belarýs chempıonatynyń qola júldegerleri arasyndaǵy joldastyq kezdesý 3:1 esebimen aıaqtaldy
ALMATY. 31 qańtar. QazAqparat /Erlik Erjanuly/ - Keshe Túrkııada Pavlodardyń "Ertis" jáne Mınskiniń "Mınsk" fýtbol klýbtary joldastyq kezdesý ótkizdi.
Onda Talǵat Baısýfınov jattyqtyratyn qazaqstandyq aıaqdopshylar qarsylastaryn 3:1 esebimen utty. Bul jerde bolgar legıoneri Georgı Daskalov dýbldiń avtory atansa, Murat Tileshov jańa maýsymǵa daıyndyq kezindegi alǵashqy dobyn engizdi. Vıtalıı Tarakov baptaıtyn Belarýs aıaqdopshylary buǵan deıin 25 qańtar kúni Holger Fah tizginin ustaǵan Astananyń «Lokomotıv» fýtbol klýbynan 2:1 esebimen basym túsken bolatyn. Bul olardyń jańa maýsymdaǵy alǵashqy oqý-jattyǵý jıynyndaǵy 2-joldastyq kezdesýi bolyp otyr. Túrkııanyń Lara qalasynda 20 qańtarda bastalǵan bul jıyn búgin aıaqtalmaq. Jalpy ótken maýsymda «Mınsk» Belarýs chempıonatynyń qola júldegeri bolsa, «Ertis» pen «Lokomotıv» Qazaqstan chempıonatynda 3-4-oryndardy ózara bólisken edi.
