Fýtboldan Qazaqstan qyzdar quramasy Eýropa chempıonatynyń alǵashqy irikteý kezeńin Polshada ótkizedi
ALMATY. 30 shilde. QazAqparat - Polshada 1-8 tamyz kúnderi fýtboldan 17 jasqa deıingi qyzdar arasynda 2013-2014 jylǵy Eýropa chempıonatynyń alǵashqy irikteý kezeńiniń oıyndary ótedi. 8-topta baq synaıtyn Qazaqstan Avstrııa, Ázirbaıjan, jáne Polsha quramalarymen básekege túsedi.
Qazaqstandyqtar alǵashqy oıynyn 2 tamyzda alań qojaıyndarymen, ekinshi oıynyn 4 tamyzda avstrııalyqtarmen, al aqyrǵy kezdesýin 7 tamyzda ázirbaıjandarmen ótkizedi.
Elısaveta Todorova baptaıtyn ulttyq qurama buǵan deıin 21-24 mamyrda Belorýssııa fýtbol federatsııasy Eýropa fýtbol qaýymdastyǵymen birlesip uıymdastyrǵan «Damý» halyqaralyq týrnırinde óz daıyndyǵyn synaǵan bolatyn. Olar Mınsk qalasynda Belorýssııa quramasyna 1:4, Ýkraına quramasyna 0:6, Reseı quramasyna 0:5 bop utylyp, tórtinshi oryndy qanaǵat tutqan bolatyn. Bapkerler keńesi bul synnan qandaı sabaq alǵanyn endi aldaǵy saıysta ańǵaratyn bolamyz.
