Fýtboldan Qazaqstan quramasy Vengrııamen oınaıdy
ASTANA. QazAqparat - Fýtboldan Qazaqstan quramasy Vengrııamen joldastyq kezdesý ótkizedi, dep habarlaıdy QazAqparat QR fýtbol federatsııasyna silteme jasap.
«Eki eldiń federatsııalary arasynda joldastyq kezdesý ótkizý týraly kelisimge qol qoıyldy. Match 23 naýryz kúni Vengrııa astanasy Býdapeshtte «Grýpama Arena» stadıonynda ótedi», - delingen federatsııa saıtynda.
Búgingi kúni Vengrııa quramasy FIFA reıtınginde 54-orynda tur. 2016 jylǵy Eýropa chempıonatynyń toptyq kezeńinde birinshi oryn aldy. 1/8 aınalymda Belgııa quramasyna ese jiberdi.
Ótken jyldyń kúzinen bastap Vengrııa quramasyn belgııalyq maman Jorj Lekens jattyqtyrady. Ol Týnıs, Aljır jáne Belgııa ulttyq quramalaryn jattyqtyrǵan. Sonymen qatar 68 jastaǵy bapker belgııalyq «Anderleht», «Brıýgge», «Gent», «Lokeren», túrkııalyq «Trabzonspor» jáne gollandııalyq «Roda» klýbtarynda da eńbek etti.
Qazirgi Vengrııa quramasynan Balaj Djýdjak, Tamash Prıshkın, Adam Salaı jáne basqalaryn atap kórsetýge bolady.
«Bizdiń komanda úshin sońǵy Eýropa chempıonatynyń basty sensatsııasyna aınalǵan Vengrııa quramasymen oınaý óte qyzyqty bolmaq. Ótken ǵasyrdyń ortasynda Vengrııa fýtboly Eýropa men álemde eń myqty ujymdardyń biri sanaldy. Vengrııa fýtboly qazirgi tańda jańa deńgeıge shyǵyp keledi. Ony ulttyq quramanyń nátıjelerinen baıqaýǵa bolady. Bizdiń komanda oń nátıjege qol jetkizip, jankúıerlerge qýanysh syılasa eken deımin», - dedi Qazaqstan fýtbol federatsııasynyń Bas hatshysy Azamat Aıtqojın.
Eske sala keteıik, 2014 jyly qos qurama joldastyq kezdesý ótkizgen bolatyn. Býdapeshtte ótken oıyn alań ıeleriniń jeńisimen aıaqtalǵan edi.
