Fýtboldan Qazaqstan quramasy Ulttar lıgasyndaǵy S dıvızıonyndaǵy ornyn saqtap qaldy
NUR-SULTAN. QazAqparat - Fýtboldan Qazaqstan ulttyq quramasy Moldovamen UEFA Ulttar lıgasy ótpeli satysynyń qarymta oıynyn ótkizdi, dep habarlaıdy QazAqparat tilshisi.
Alǵashqy oıynda Qazaqstan quramasy syrt alańda Moldovany 2:1 esebimen tize búktirgen edi.
Sondyqtan moldovalyq fýtbolshylar oıyndy belsendi bastady. Nátıjesinde 13-mınýtta olardyń qatarynan Igor Armash qazaqstandyq oıynshylardyń qateligin utymdy paıdalanyp, qaqpany dál kózdep ketti.
El quramasy bas bapkerniń mindetin atqarýshy Andreı Karpovıch matchtyń alǵashqy mınýttan Moldovaǵa qarsy Igor Shatskıı, Ǵafýrjan Súıimbaev, Nuraly Álip, Sergeı Malyı, Aleksandr Marochkın, Marat Bystrov, Ashat Taǵybergen, Islambek Qýat, Vladıslav Vasılev, Baktıer Zaınýtdınov, Abat Aıymbetov oıynshylardy shyǵardy.
Eki oıynnyń qorytyndysymen tarazy basy teńesti. Budan keıin qos quramanyń da esepti ózgertetin múmkindigi bolǵan. Ekinshi kezeńde qazaqstandyq fýtbolshylar alǵa qaraı umtyldy. Alaıda gol soǵatyn múmkindikterdi múlt jiberdi.
Oıynda Moldova 1:0 esebimen jeńdi. Eki oıynnyń nátıjesimen tarazy basy teńeskendikten oıyn overtaımǵa ulasty.
Overtaımda jeńimpaz anyqtalǵan joq. Penaltıde Qazaqstannyń joly boldy. Osylaısha el quramasy 2022-2023 jylǵy maýsymda Ulttar lıgasynyń úshinshi dıvızıony úshinshi tobynda synǵa túsedi. Qarsylastary - Slovakııa, Belarýs jáne Ázerbaıjan.
Eske salsaq, Qazaqstan quramasy Ulttar lıgasy 2020/21 jylǵy kezeńinde S lıgasynda Albanııa, Belarýs jáne Lıtvamen synǵa túsip, tórtinshi oryndy mise tutty.
