Fýtboldan Qazaqstan quramasy UEFA aıasynda tarıhı kórsetkishke qol jetkizdi
El quramasy buǵan deıin Eýropa chempıonatynyń irikteý satysynda mundaı upaı ıelengen emes. Atap aıtqanda, 2008 jyly – 10, 2012 jyly – 4, 2016 jyly – 5, 2020 jyly – 10 upaı jınaǵan edi.
Al Eýropa qurlyǵy boıynsha álem chempıonaty irikteý satysynda 2006 jyly – 1, 2010 jyly – 6, 2014 jyly – 5, 2018 jyly – 3, 2022 jyly – 3 upaıdy mise tutty.
Alda úsh oıyn bar. Bul kórsetkish áli de jaqsara túsedi degen úmittemiz.
Eske salsaq, el quramasy búgin, 10 qyrkúıekte «Astana-Arenada» 2024 jylǵy Eýropa chempıonatyna irikteýdiń 6-týrynda Soltústik Irlandııany 1:0 esebimen jeńdi. Kezdesý barysynda 27-mınýtta qazaqstandyq shabýylshy Maksım Samorodov mergendigimen kózge tústi. Bul gol Qazaqstan quramasyna tórtinshi márte jeńis alyp keldi. Matchty trıbýnadan Prezıdent Qasym-Jomart Toqaev tamashalady. Oıynnan keıin Memleket basshysy sportshylarymyzben kezdesip, jeńispen quttyqtady.
Buǵan deıin el quramasy bes kezdesý ótkizgen edi. Aldymen Slovenııadan 1:2 esebimen jeńilse, Danııany – 3:2, San-Marınony – 3:0, Soltústik Irlandııany – 1:0 esebimen qapy qaldyrdy.
Qazaqstan quramasyna 2022 jyldyń 27 sáýirinen bastap reseılik bapker Magomed Adıev jetekshilik etip keledi. Onyń jetekshiligimen fýtbolshylar 14 oıyn ótkizdi. Qazirge deıin Ulttyq qurama 8 márte jeńiske jetip, bireýinde teń nátıje tirkeldi, beseýinde qarsylasyna ese jiberdi.
Osy ýaqyttaǵy týrnır kestesindegi kórsetkish boıynsha Qazaqstan 2024 jylǵy Eýropa chempıonatyna irikteý satysynda 6 oıynnan keıin 12 upaımen ekinshi orynda tur.
Aıta keteıik, dál qazir Qazaqstan oıyn kórsetetin H tobynda Fınlıandııa men Danııa kezdesýi ótip jatyr. Ázirge esep –0:0.
Al saǵat 00.45-te Slovenııa men Soltústik Irlandııa quramalary jasyl alańǵa shyǵady.
Endi Qazaqstan quramasy syrt alańda 14 qazanda Danııamen, 17 qazanda Fınlıandııamen kezdesedi.
