Fýtboldan Qazaqstan «quramasy» Germanııa men Túrkııany oısyrata jeńdi
ASTANA. QazAqparat - Máskeýde ótip jatqan «Art-Football 2018» atty ártister arasyndaǵy fýtboldan álem chempıonatynda Qazaqstan fýtbol quramasy germanııalyq áriptesterin 6-1 esebimen oısyrata jeńdi. Al búgin túrik aǵaıyndardy 2-1 esebimen utqan bizdiń juldyzdar elge abyroımen qaıtty, dep habarlaıdy QazAqparat tilshisi QR Mádenıet jáne sport mınıstrliginiń baspasóz qyzmetine silteme jasap.
«Art-Football» áýendi fýtbol festıvali álemdegi aıtýly qaıyrymdylyq is-sharalardyń biri. Atalǵan týrnır Reseı Federatsııasy Sport mınıstrliginiń uıymdastyrýymen «Igilik týy astyndaǵy» qaıyrymdylyq aktsııasy aıasynda jyl saıyn dástúrli túrde ótkiziledi. Uıymdastyrýshylardyń aıtýynsha, jınalǵan qarajat naýqas sábılerdiń emine jumsalady.
"Juldyzdar bul týrnırde sport alańynda kezdesip qana qoımaı, mýzykalyq sheberlikterin kórsetedi, tájirıbe almasady. Álem chempıonatyna qatysýǵa qoldaý kórsetken QR Mádenıet jáne sport mınıstri Arystanbek Muxamedıulyna zor alǵys bildire otyryp, búgingi jeńisimizdi elordamyzdyń 20-jyldyq mereıtoıyna arnaımyz",- dedi qazaqstandyq prodıýser Almas Altynbekov.
Bıylǵy festıvalǵa Qazaqstan, Reseı, Argentına, Perý, Italııa, Serbııa, Ulybrıtanııa, Belarýs, Slovenııa, Slovakııa, Koreıa, Túrkııa, Rýmynııa, Germanııa, Paragvaı, Japonııa memleketterinen kelgen 16 fýtbol komandasy qatysýda. Qazaqstan fýtbol qurama sapynda oınaǵan ánshiler: komanda kapıtany Muqasan Shahzadaev, Nurjan Kermenbaev, Ǵadilbek Janaı, Abdýlkárim Kárimov, Mels Saǵatuly, Rysbek Atash, Erbol Narımanuly, Azamat Syzdyqov, Raıym Ýaıs, Jubanysh Jeksenuly, Aıan Birbaev, Ádiljan Ýmarov, Arman Qońyrbaev, Kúntýǵan Soltan, Ańsat Dildabaı bolsa, el namysyn akterlerden Táýekel Músilim, Ádil Ahmetov, Qýanysh Kerimqulov, Shyńǵys Tólegen, Marselen Kamate, rejısserlerden Aqylbek Dosjanov, Ánýar Matjanov jáne prodıýserler Ǵalymjan Arystanbekuly, Almas Altynbekov, Abaı Jansarbaev qorǵady.
Aıta keteıik, buǵan deıin otandyq shoý-bıznes ókilderi chempıonatqa 5 ret qatysyp, byltyrǵy týrnırdiń fınalynda Ulybrıtanııa quramasyn 2-1 esebimen jeńip, álem chempıony atanǵan edi.
