Fýtboldan Qazaqstan quramasy Eýrokýbok jolyndaǵy Avstrııamen kezdesýinde 0:2 esebimen utylyp qaldy
ALMATY. Qyrkúıektiń 8-i. QazAqparat /Erbol Turymbetov/ - Keshe fýtboldan EVRO - 2012 kýbogy jolyndaǵy Avstrııa - Qazaqstan kezdesýi ótti. Qazaqstan quramasy qarsylastarynan 2:0 esebimen tize búkti, dep habarlaıdy QazAqparat.
Oıyn bastalysymen tizgindi qolǵa alǵan alań ıeleri bizdiń qurama qorǵaýshylaryn tyqsyra bastady. Jıi shabýyldar uıymdastyryp, Sıdelnıkov qaqpasyna birneshe ret qaýipti soqqylar jasady. Eń alǵashqy qaýipti sát 10-shy mınýttaǵy shabýylshy Martın Harnıktiń jasaǵan shabýyly boldy. Qazaqstan quramasynyń tórt birdeı qorǵaýshysyn aldap ótken ol Sıdelnıkovpen jekpe-jekke shyǵyp, biraq dittegen maqsatyna jete almaı qaldy. Oıynnyń birinshi kezeńiniń sońyna deıin bizdiń qaqpashyny mazalaǵan avstrııalyqtar birneshe ótkir shabýyldar uıymdastyryp úlgerdi.
Ekinshi taımda quramadaǵy shabýylshy Ostapenkonyń ornyn toltyryp júrgen Gleb Maltsevtiń ornyna Hıjnıchenko shyqty. Bir sátte ol qarsylastardyń aıyp alańynda Nurbolǵa ońtaıly pas shyǵarǵanmen, Jumasqalıevtiń soqqysy qaqpadan bıik ketti.
Oıynnyń negizgi ýaqytynda teń aıaqtalǵan kezdesýdiń taǵdyry sońǵy ýaqyttarda ǵana sheshildi. 90-shy mınýtta qarsylastar shabýylshysy Roland Lınts Hofferdiń kómegimen bizdiń eki qorǵaýshydan ótip baryp Qazaqstan qaqpasynyń kiltin tapty. Tez arada qarymta shabýyl uıymdastyrmaq bolǵan qazaqstandyqtar oılamaǵan jerden doptan aıyrylyp qaldy. Bul múmkindikti de qur jibermegen shabýylshy Ervın Hoffer esepti eseledi. Kezdesý 2:0 esebimen alań ıeleriniń paıdasyna sheshildi.
Oıynnyń Bas tóreshisi - Marıo Strahonıa (Horvatııa). Zaltsbýrg, «Zaltsbýrg Arena» stadıony.
