Qazaqstan fýtbol quramasy FIFA reıtınginde neshinshi orynda tur

Fýtboldan Qazaqstan quramasynyń qarasha aıyndaǵy FIFA reıtıngindegi orny belgili boldy, dep habarlaıdy Kazinform.

Qarasha aıynda ulttyq qurama San-Marıno (3:1) jáne Slovenııamen (1:2) kezdesti.

Oıyndar nátıjesi boıynsha reıtıngte eki orynǵa tómen túsip, 100-orynǵa jaıǵasty.

Álemdik reıtıngte Argentına, Frantsııa, Anglııa alǵashqy úshtikte tur.

Odan keıingi oryndarǵa Belgııa, Brazılııa, Nıderland, Portýgalııa, Ispanııa, Italııa, Horvatııa keledi.

Al Ulttar lıgasy pleı-off satysyndaǵy jartylaı fınalda kezdesetin Grekııa 47-orynda tursa, fınaldaǵy yqtımal qarsylastarymyz Grýzııa - 77, Lıýksembýrg - 87 orynǵa jaıǵasqan.

Qazaqstandyq fýtbolshylar Eýropa chempıonaty irikteý satysynda besinshi márte baq synady. 2008, 2012 jyldarda - 6, 2016, 2020 jyldarda - 5 oryn aldy.

Qazirge deıin 2024 jylǵy qurlyqtyq dodanyń fınaldyq satysyna Frantsııa, Portýgalııa, Belgııa, Ispanııa, Shotlandııa, Túrkııa, Anglııa, Aýstrııa, Vengrııa, Slovakııa, Albanııa, Danııa, Nıderland, Shveıtsarııa, Rýmynııa, Serbııa quramalary shyqty.

Al Germanııa uıymdastyrýshy el retinde irikteýsiz qatysady.