Fýtboldan Qazaqstan quramasynyń burynǵy oıynshysy sporttyq mansabyn aıaqtady

ASTANA. KAZINFORM - Fýtboldan Qazaqstan ulttyq quramasynyń burynǵy oıynshysy Ǵafýrjan Súıimbaev 34 jasynda sporttyq mansabyn aıaqtady.

Bul jóninde fýtbolshynyń ózi áleýmettik jelidegi paraqshasynda jazdy. 

Ǵafýrjan Súıimbaev 1990 jyly dúnıege kelgen. 2007 jyldan bastap «Ordabasy», «Qaırat», «Ertis», «Aqsý» komandalarynda oıyn kórsetti. 

2014-2022 jyldarda ulttyq qurama sapynda 42 match ótkizip, 4 gol soqty.

Ol bıyl birinshi lıgada oınaıtyn pavlodarlyq «Ertis» quramyna aýysqan edi. Alǵan jaraqatyna baılanysty komandamen kelisim-shartty erte buzýǵa májbúr boldy.

Eske salsaq, budan buryn qazaqstandyq Qaırat Nurdáýletov Birinshi lıgada oınaıtyn pavlodarlyq «Ertis» klýby bas bapkeri qyzmetinen ketti.

Ol atalǵan klýb tizginin bıylǵy qańtar aıynyń basynda ustaǵan edi.

Pavlodarlyq klýb Birinshi lıgada bes týrdan keıin 13 upaımen kósh basynda keledi. Enshisinde tórt jeńis, bir teń oıyn bar.