Fýtboldan Qazaqstan quramasynyń búgingi qarsylasy - Kıýrasao jaıly ne bilemiz

ASTANA. KAZINFORM - Búgin fýtboldan Qazaqstan ulttyq quramasy Kıýrasaomen oınaıdy.

Kezdesý 19 naýryzda qazaqstandyq ýaqytpen 21:30-da bastalady.

Qazaqstan fýtbol federatsııasynyń málimetinshe, eki taraptyń kelisimi boıynsha match jabyq túrde ótedi. Mátindik jáne beınekórsetilim, negizgi quram jáne beınematerıal bolmaıdy, Oıyn aıaqtalǵannan keıin fotoreportaj, match nátıjesi men gol avtorlary habarlanady.

FIFA reıtınginde Kıýrasao quramasy 91-orynda tur. Olarǵa áıgili nıderlandtyq maman Dık Advokat jetekshilik etedi.

Kıýrasao quramasy 2026 jylǵy álem chempıonaty irikteý satysynda Soltústik Amerıka jáne Karıb basseıni boıynsha synǵa túsip jatyr. Qazir ekinshi irikteý kezeńinde alty upaımen S tobynda kósh bastap keledi. Alǵashqy eki oıynda Barbadosty 4:1 esebimen tize búktirse, odan keıin Arýbany 2:0 esebimen jeńdi. 

Endi olar 6 maýsymda Sen-Lıýsııamen kezdesse, 10 maýsymda Gaıtımen sheberlik baıqasady. 

Kıýrasao quramasy sapyna negizinen Nıderland chempıonatynda synǵa túsip júrgen fýtbolshylar shaqyrylǵan. Oǵan qosa AQSh, Shvetsııa, Germanııa, Avstralııa, Portýgalııa, Kıpr, Birikken Arab Ámirligi, Qatar elderinde oınaıtyndar bar. 

2026 jylǵy álem chempıonaty irikteý satysynda Qazaqstan quramasy J tobynda synǵa túsedi.

Qarsylastary — Belgııa, Ýels, Soltústik Makedonııa jáne Lıhtenshteın.

Matchtar 2025 jyldyń naýryzynda bastalyp, qarasha aıynda aıaqtalady.

Aıta ketsek, Qazaqstan quramasy 22 naýryzda syrt alańda Ýelspen kezdesse, 25 naýryzda Lıhtenshteınge qarsy oınaıdy.