Fýtboldan Qazaqstan quramasy joldastyq kezdesýde Armenııamen teń tústi
ASTANA. KAZINFORM - Búgin, 6 maýsymda fýtboldan Qazaqstan ulttyq quramasy Armenııamen joldastyq match ótkizdi.
Kezdesý barysynda Talǵat Baısýfınov negizgi quramda birqatar jas fýtbolshylarǵa senim bildirdi. Olardyń qatarynda Dastan Sátpaev, Jasulan Ámir sekildi oıynshylar bar.
Alǵashqy mınýttan armenııalyq fýtbolshylar tizgindi óz qolyna alýǵa tyrysty. Oıyn barysynda olardyń basymdyǵy baıqalyp turdy. Oǵan qazaqstandyq oıynshylar laıyqty toıtarys bere bildi. Soǵan qaramastan birinshi kezeńde tablodaǵy esepke ózgeris engizilgen joq.
Ekinshi kezeńde 50-mınýtta qazaqstandyq Maksım Samorodov óz múmkindigin múlt jbergen joq. Oǵan 53-mınýtta armenııalyq Edýard Spertsıan bir golmen jaýap qaıyrdy.
Osylaısha qarsylastar 1:1 esebine qanaǵat bildirdi.
Qazirge deıin eki qurama segiz márte kezdesken edi. Altaýynda armenııalyq fýtbolshylar jeńiske jetip, bir kezdesý teń aıaqtalsa, bireýinde otandastarymyz basym tústi.
Qazaqstan quramasynyń tizimi
Qaqpashylar: Temirlan Anarbekov («Qaırat»), Aleksandr Zarýtskıı («Aqtóbe»), Bekhan Shaızada («Ordabasy»).
Qorǵaýshylar: Nuraly Álip («Zenıt», Reseı), Aleksandr Mrynskıı, Erkin Tapalov (ekeýi de – «Qaırat»), ıAn Vorogovskıı, Álibek Qasym (ekeýi de – «Astana»), Sergeı Malyı («Ordabasy»), Arsen Áshirbek («Elimaı»), Sanjar Satanov («Atyraý»), Saǵı Sovet («Qaısar»).
Jartylaı qorǵaýshylar: Ramazan Orazov («Elimaı»), Jasulan Ámir («Ordabasy»), Islambek Qýat («Jeńis»), Dinmuhamed Qaraman («Astana»), Serikjan Mýjıkov («Jetisý»), Ábınur Nurymbet («Oqjetpes»).
Shabýylshylar: Dastan Sátpaev («Qaırat»), Ǵalymjan Kenjebek, Maksım Samorodov (ekeýi de – «Ahmat», Reseı), Islam Chesnokov («Harts», Shotlandııa), Roman Mýrtazaev («Elimaı»), Maǵjan Toqtybaı («Ordabasy»), Maqsat Abraev («Astana»).
Otandastarymyz endi 9 maýsymda Majarstanmen syrt alańda joldastyq kezdesý ótkizedi.
