Fýtboldan Qazaqstan quramasy Soltústik Makedonııamen teń tústi

ASTANA. KAZINFORM - Fýtboldan 2026 jylǵy álem chempıonaty irikteý kezeńinde Qazaqstan quramasy kezekti oıynyn Soltústik Makedonııaǵa qarsy ótkizdi.

Eki qurama alǵashqy mınýttan belsendi qımyl kórsetti. Gol soǵatyn múmkindikter de boldy. Degenmen olar dittegen maqsatyna jete alǵan joq.

Oıyn barysynda Ǵalymjan Kenjebektiń belsendiligi kórinip turdy. Oǵan qosa qazaqstandyq Muhamedjan Seısen birneshe márte qaqpasyna dop darytqan joq. Birinshi kezeńde esep ashylǵan joq.

Ekinshi kezeńde makedonııalyq fýtbolshylardyń belsendiligi baıqaldy. Oǵan qazaqstandyq qorǵaýshylar laıyqty toıtarys bere bildi. Esesine qarsy shabýylǵa shyǵyp, gol soǵatyn múmkindikti izdedi. Oıynnyń 54-mınýtynda Dinmuhamed Qaraman óz quramasyn alǵa shyǵardy. Al makedonııalyq Enıs Bardı 74-mınýtta tarazy basyn teńestirdi.

Osylaısha quramalar 1:1 esebine qanaǵat bildirdi.

Bul topta Belgııa quramasy syrt alańda Ýelsti 4:2 esebimen tize búktirdi.

Endi otandastarymyz aldaǵy oıynyn 15 qarashada óz alańynda Belgııaǵa qarsy ótkizedi.

Otandastarymyz qazirge deıin Belgııa (0:6), Soltústik Makedonııa (0:1) jáne eki márte Ýels (1:3, 0:1) quramasynan jeńilip, Lıhtenshteınnen eki márte (2:0, 4:0) basym tústi.

Al Soltústik Makedonııa eki márte Lıhtenshteındi (3:0, 5:0) jeńse, Belgııamen eki ret (1:1, 0:0), Ýelspen (1:1) teń oınady.

Qarsylastar qazirge deıin eki márte kezdesti. Ekeýinde de makedonııalyq fýtbolshylar jeńiske jetti.