Fýtboldan Qazaqstan quramasy Soltústik Koreıamen joldastyq kezdesý ótkizedi

ASTANA. KAZINFORM - Fýtboldan Qazaqstan ulttyq quramasy Túrkııadaǵy oqý-jattyǵý jıyny aıasynda Soltústik Koreıa quramasymen kezdesedi.

Bul joldastyq kezdesý 17 aqpanda Koreı Halyq-Demokratııalyq Respýblıkasy (KHDR) quramasyna qarsy ótedi. Match Qazaqstan ýaqytymen 19:00-de bastalady.

KHDR quramasy – 1966 jáne 2010 jylǵy álem chempıonattarynyń qatysýshysy. Sondaı-aq, 2010 jáne 2012 jyldary AFK Shaqyrý kýbogynda jeńiske jetken.

Oqý-jattyǵý jıyny Túrkııanyń Belek qalasynda 18 aqpanǵa deıin ótedi. Jıynnyń negizgi maqsaty - ulttyq quramaǵa úmitkerlerdi qaraý. Sondyqtan bapkerlik shtab atalǵan jıynǵa ulttyq quramaǵa úmitkerler men jas oıynshylardy shaqyrdy.

Qazaqstan fýtbol federatsııasynyń habarlaýynsha, dál qazir oıyn Ózbekstannyń «Lokomotıv» (Tashkent) klýbyna qarsy ótip jatyr. Bapkerlik shtabtyń sheshimimen atalǵan oıyn jabyq rejımde uıymdastyrylady.

Aıta ketsek, Qazaqstan quramasy 2026 jylǵy Álem chempıonatynyń irikteý týrnırinde Ýels, Lıhtenshteın, Soltústik Makedonııa jáne Belgııa komandalarymen birge J tobyna tústi.

Ulttyq qurama irikteý kezeńin 23 naýryz kúni syrt alańda Ýelske qarsy oıynmen bastaıdy. Úsh kúnnen soń Lıhtenshteınmen kezdesedi. Eki oıyn da syrt alańda ótedi.

Osyǵan deıin fýtboldan Qazaqstan quramasy Túrkııada oqý-jattyǵý jıynyn ótkizetini týraly habarlaǵan edik.