Fýtboldan Qazaqstan quramasy búgin Soltústik Koreıamen kezdesedi

ASTANA. KAZINFORM - Fýtboldan Qazaqstan quramasy Túrkııada ótip jatqan oqý-jattyǵý jıyny barysynda Soltústik Koreıamen kezdesedi.

Kezdesý elorda ýaqytymen 19:00-de bastalyp, «Qazsport» telearnasynan tikeleı efırden kórsetedi.

Soltústik Koreıa quramasy – 1966 jáne 2010 jylǵy álem chempıonattarynyń qatysýshysy. Sondaı-aq, 2010 jáne 2012 jyldary AFK Shaqyrý kýbogynda jeńiske jetken.

Eki qurama óz tarıhynda alǵash ret kezdesedi.

Soltústik Koreıa 2026 jylǵy álem chempıonaty irikteý satysynyń úshinshi irikteý kezeńinen qatysyp jatyr. Qazir A tobynda nebári eki upaımen altynshy oryndy mise tutyp tur.

Olar aldaǵy eki oıynyn 20 naýryzda Qatarǵa, 25 naýryzda Birikken Arab Ámirligine qarsy ótkizedi.

10 aqpanda Qazaqstan quramasy Túrkııanyń Belek qalasynda alǵashqy oqý-jattyǵý jıynyn bastady. Oqý-jattyǵý 18 aqpanǵa deıin jalǵasady. Oqý-jattyǵý jıynynyń basty maqsaty – ulttyq quramaǵa úmitkerlerdi irikteý. Sondyqtan bapkerler shtaby bul oqý-jattyǵý jıynyna ulttyq quramaǵa úmitkerler men jas oıynshylardy shaqyrdy.

Eske salsaq, budan buryn Qazaqstan ulttyq quramasy ózbekstandyq klýbpen teń tústi.