Fýtboldan Qazaqstan quramasy búgin Grekııaǵa attanady
ASTANA. KAZINFORM - Birikken Arab Ámirliginiń Dýbaı qalasynda ótip jatqan oqý-jattyǵý jıynyna fýtboldan Qazaqstan quramasynyń oıynshylary tolyq quramda jınaldy.
El quramasy Ulttar lıgasy pleı-off satysyndaǵy Grekııaǵa qarsy oıynǵa 19 naýryzda attanady.
Oqý-jattyǵý jıynyna sońǵy bolyp Reseıdiń «Zenıt» komandasynyń qorǵaýshysy Nuraly Álip qosyldy.
Qorǵaýshy 2018 jyldan beri ulttyq qurama sapynda oıyn kórsetip keledi. Qazirge deıin 30 kezdesýge qatysty. Ázirge qarsylastar qaqpasyna gol soǵa alǵan joq.
Oqý-jattyǵý jıyny aıasynda qazaqstandyq fýtbolshylar Túrikmenstanmen ótken joldastyq kezdesýde qarsylasyn 2:0 esebimen tize búktirdi.
Keıinnen oqý-jattyǵý jıynyna Baktıer Zaınýtdınov pen Abat Aıymbetov qosyldy.
Aıta ketsek, Qazaqstan quramasy Ulttar lıgasynda S jolymen 2024 jyldyń 21 naýryzynda jartylaı fınalda syrt alańda Grekııamen kezdesedi.
Jeńgen jaǵdaıda 26 naýryzda taǵy da syrt alańda Grýzııa-Lıýksembýrg jubynyń jeńimpazymen sheberlik baıqasady. Jeńimpaz qurama 2024 jylǵy Eýropa chempıonaty fınaldyq satysyna joldama alady.
Qazaqstandyq fýtbolshylar qurlyqtyq dodanyń irikteý satysynda H tobynda synǵa túsip, úshinshi orynǵa turaqtady. Olar barlyǵy 18 upaı jınap, ulttyq quramanyń rekordyn jańartty.
