Fýtboldan Qazaqstan quramasy Armenııamen joldastyq kezdesý ótkizedi
ASTANA. KAZINFORM — Fýtboldan Qazaqstan ulttyq quramasy maýsym aıynda joldastyq kezdesý ótkizedi.
Bul jóninde Qazaqstan fýtbol federatsııasy málim etti.
Kezdesý maýsym aıynyń 6-na josparlanǵan.
Oıyn Armenııa astanasy Erevan qalasyndaǵy Vazgen Sarkısıan atyndaǵy respýblıkalyq stadıonda ótedi.
Eki qurama sońǵy márte 2024 jyldyń 7 maýsymynda joldastyq kezdesý ótkizgen edi. Onda armenııalyq fýtbolshylar 2:1 esebimen jeńiske jetken edi.
Sondaı-aq olar 9 maýsymda Vengrııamen joldastyq kezdesý ótkizedi dep josparlanyp otyr.
Aıta ketsek, otandastarymyz 25-31 naýryz aralyǵynda Halyqaralyq fýtbol federatsııasynyń (FIFA) ulttyq quramalarǵa arnalǵan jańa formattaǵy FIFA Series týrnırine qatysady.
Astanada ótetin oıyndarynda olardan ózge Namıbııa men Komor araldary synǵa túsedi.
Aldymen qazaqstandyq fýtbolshylar 25 naýryzda Namıbııamen sheberlik baıqassa, 31 naýryzda Komor araldarymen jasyl alańǵa shyǵady.
Al 28 naýryzda Namıbııa men Komor araldary oınaıdy.
Joba — álemniń ártúrli qurlyqtaryndaǵy quramalardy bir alańǵa jınap, ózara tájirıbe almasýǵa múmkindik beretin halyqaralyq jarys. Týrnırdiń basty ereksheligi — komandalardyń basqa konfederatsııa ókilderimen oınaýyna jaǵdaı jasaý.
