Fýtboldan Qazaqstan quramasy aldaǵy oıynǵa tolyqtaı daıyn
ASTANA. KAZINFORM - Fýtboldan Qazaqstan quramasy 2026 jylǵy álem chempıonaty irikteý kezeńindegi Lıhtenshteınge qarsy oıyny aldynda baspasóz máslıhatyn ótkizdi.
Kezdesý naýryzdyń 25-inen 26-yna qaraǵan túni saǵat 00:45-te bastalyp, «Qazsport» telearnasynan tikeleı efırde kórsetiledi. Ulttyq quramanyń bas bapkeri mindetin atqarýshy Alı Alıev óz shákirtteriniń aldaǵy kezdesýge daıyn ekenin atap ótti.
- Maǵan quramanyń jeńiske degen jigeri unaıdy. Ýelspen kezdesýden keıin olardyń oıyn túsindim. Qurama upaı alýǵa jaqyn boldy. Jigitter aldaǵy kezdesýge psıhologııalyq turǵydan daıyn. Ol kóp nárseni bildiredi. Árbir fýtbolshy sátsizdikten sabaq alýǵa tyrysady. Biz jaqsy jáne mazmundy oıyn kórsetýge daıynbyz degen senimdemin, - dedi Alı Alıev.
Jartylaı qorǵaýshy Georgıı Jýkov óz áriptesterimen birge joǵary nátıjege qol jetkizýge kúsh salatynyn aıtty.
- Quramada talantty fýtbolshylar kóp. Joǵary nátıjege qol jetkizýge tyrysamyz. Ótken oıynda jasyl alańǵa shyqtym. Qujatym boıynsha eshqandaı problema joq. Ulttyq quramaǵa shaqyrýdy uzaq kúttim. Men quramaǵa oınamaıtynym jóninde eshqashan aıtqan emespin. Ol ýaqytta Qytaıda karantın boldy. Bul meniń jaýapkershiligime jatpaıdy. Quramaǵa shaqyrý alǵannan keıin senimdi aqtaýyń tıis. Óz tarapymnan bas bapkerge alǵys aıtamyn. Ol maǵan taǵy bir márte senim artyp otyr. Eger meniń budan buryn aıtqan sózime renish bildirgender bolsa, olardan keshirim suraımyn, - dedi Georgıı Jýkov.
Al qorǵaýshy Ádilbek Jumahanov fýtbolshylardyń ótken qatelikten sabaq alatynyna toqtaldy.
- Alda bizdi mańyzdy oıyn kútip tur. Ulttyq qurama tarapynan sátsizdik serııasy bir jyldan astam ýaqytqa sozyldy degen áńgime aıtylady. Ekinshi týrdaǵy kezdesýde bapkerlerdiń qoıǵan taktıkasyn tolyq oryndaýǵa kúsh salamyz. Ótken qatelikterden sabaq alýǵa kóńil bólemiz, - dedi ol.
El quramasy 2026 jylǵy álem chempıonatyna irikteý kezeńinde J tobynda oıyn kórsetedi. Qarsylastary — Belgııa, Ýels, Soltústik Makedonııa jáne Lıhtenshteın.