Fýtboldan Qazaqstan kýbogynda «Atyraý» «Ordabasydan» oısyraı jeńildi
NUR-SULTAN. QazAqparat - Fýtboldan Qazaqstan kýbogynyń toptyq kezeńi úshinshi týrynyń alǵashqy oıyn kúni ótti, dep habarlaıdy QazAqparat tilshisi.
Bul kúngi birinshi kezdesýde «Atyraý» óz alańynda Shymkenttiń «Ordabasy» komandasyn qabyldady.
Oıyn barysynda shymkenttik klýb jınaqy qımyl kórsetti. Nátıjesinde qarsylastar qaqpasyna tórt gol soǵyp ketti. Oǵan atyraýlyq fýtbolshylar bir golmen jaýap qaıyrdy.
Osylaısha «Atyraý» qarsylasyna 1:4 esebimen jol berdi.
Taǵy bir kezdesýde «Taraz» ben «Aqtóbe» komandalary 0:0 esebine qanaǵat bildirdi.
Endi atalǵan týrda 23 shildede «Kaspıı» (Aqtaý) men «Qaısar» (Qyzylorda) komandalary kezdesedi.
Al 24 shildede «Turan» (Túrkistan) men «Astana» (Nur-Sultan), «Aqjaıyq» (Oral) pen «Qyzyljar» (Petropavl), «Jetisý» (Taldyqorǵan) men «Shahter» (Qaraǵandy), «Tobyl» (Qostanaı) men «Maqtaaral» (Túrkistan oblysy), «Qaırat» (Almaty) pen «Aqsý» (Pavlodar oblysy) komandalary oınaıdy.
Eske salsaq, fýtzaldan Qazaqstan quramasy álem chempıonatynyń negizgi satysyndaǵy oıyn kestesi anyqtaldy.
