Fýtboldan Qazaqstan kýbogynda «Aqtóbe» men «Atyraý» teń tústi
ASTANA. QazAqparat - Búgin fýtboldan Qazaqstan kýbogy 1/8 fınalyndaǵy taǵy eki oıynnyń nátıjesi belgili boldy, dep habarlaıdy QazAqparat tilshisi.
Qaraǵandynyń «Shahteri» óz alańynda Kókshetaýdyń «Oqjetpesin» qabyldady.
Oıyn barysynda alań ıeleri qatarynan Ivan Svırıdov 35-mınýtta mergendigimen kózge tústi.
Nebári 19 jastaǵy shabýylshy el birinshiliginde mergendigimen kózge túsip keledi. Ol 3 oıynda qarsylastar qaqpasyn eki márte dál kózdep úlgerdi.
Osylaısha «Shahter» qarsylasynan 1:0 esebimen basym tústi.
Al «Aqtóbe» men «Atyraý» kezdesýi golǵa toly boldy.
Oıynnyń 10-mınýtynda atyraýlyq komandadan Demır Imerı esep ashsa, oǵan aqtóbelik klýbtan Elder Santana tarazy basyn teńestirdi.
«Atyraý» sapynan Oralhan Ómirtaev 78-mınýtta qaıtadan óz komandasyn alǵa shyǵarsa, aqtóbelik fýtbolshy Eskendir Qybyraı qaıtadan tarazy basyn teńestirdi.
Komandalar 2:2 esebine qanaǵat bildirdi.
Eske salsaq, budan buryn «Qyzyljar» «Jetisýdy» 3:0 esebimen súrindirse, «Kaspıı» «Turanǵa» 0:1 esebimen jol berdi.
Endi 19:00-de «Qaırat» (Almaty) - «Aqjaıyq» (Oral), «Tobyl» (Qostanaı) - «Aqsý» (Pavlodar oblysy) sheberlik baıqasady.
Sondaı-aq, 21:00-de «Ordabasy» (Shymkent) - «Maqtaral» (Túrkistan oblysy), «Astana» - «Qaısar» (Qyzylorda) jasyl alańǵa shyǵady.
Qarymta oıyn 29 jáne 30 sáýir kúnderine belgilengen.
