Fýtboldan Qazaqstan kýbogy: Jartylaı fınaldaǵy komandalar anyqtaldy
NUR-SULTAN. QazAqparat - Fýtboldan Qazaqstan kýbogy jartylaı fınalyna joldama alǵan komandalar belgili boldy, dep habarlaıdy QazAqparat tilshisi.
Budan buryn «Atyraý» jáne «Ordabasy» komandalarynyń jartylaı fınalǵa joldama alǵanyn habarlaǵan edik. Endi olardyń qataryna «Qaısar» men «Tobyl» qosyldy.
Pavlodarda jergilikti «Ertis» Qyzylordanyń «Qaısar» komandasyn qabyldady. Bul kezdesýde aldymen alań ıeleri esep ashty. Ony 15-mınýtta Magomed Paragýlgov sheber oryndady. Al «Qaısar» ekinshi kezeńde qos gol soǵyp ketti. Olardyń qatarynan 26-mınýtta Ivan Sadovnıchıı baspen qarsylastar qaqpasy toryn búlk etkizse, 88-mınýtta Ashat Taǵybergen alystan qaqpany dál kózdedi. Osylaısha jartylaı fınalǵa joldama aldy.
Taǵy bir kezdesý Almaty qalasynda ótkizildi. Jergilikti «Qaırat» Qostanaıdyń «Tobylyna» qarsy tura alǵan joq. Almatylyq klýb óz qaqpasyna tórt dop jiberip aldy. Qostanaılyqtar qatarynan Baýyrjan Turysbek 13, Maksım Fedın 25, Mıhaıl Gordeıchýk 44-mınýttarda mergendik tanytty. Al ekinshi kezeńniń 59-mınýtynda «Qaırat» oıynshysy Islambek Qýat óz qaqpasyna gol soǵyp aldy. Al 89-mınýtta «Tobyl» oıynshysy Azat Nurǵalıev alań ıeleri qaqpasyna besinshi goldy saldy. «Qaırat» oǵan ajýap retinde 90-mınýtta jalǵyz golmen jaýap qaıyrdy. Ony jas shabýylshy Samat Sársenov óziniń enshisine jazdy. Osylaısha «Tobyl» syrt alańda «Qaıratty» 5:1 esebimen tize búktirip, jarysty jalǵastyrýǵa múmkindik aldy.
