Fýtboldan Qazaqstan kýbogy: Shırek fınalǵa shyqqan alty komanda anyqtaldy
NUR-SULTAN. QazAqparat - Fýtboldan Qazaqstan kýbogynyń altynshy týryndaǵy eki oıyn kúni aıaqtaldy, dep habarlaıdy QazAqparat tilshisi.
Almatynyń «Qaıraty» syrt alańda Aqtaýdyń «Kaspıı» klýbyn 4:2 esebimen jeńdi. Oıyn barysynda almatylyq klýb sapynan Rade Dýgalıch 6, 34, Aıbol Ábiken 9, Hose Kante 44-mınýttarda mergendik tanytty. Oǵan aqtaýlyq komandadan Shafık Tıgrýdja 41, Ramazan Karımov 46-mınýtta eki golmen jaýap qaıyrdy.
Osylaısha D tobynda «Qaırat» toǵyz upaımen ekinshi oryn aldy. Al 13 upaımen «Kaspıı» birinshi orynǵa shyqty.
V tobynda Qostanaıdyń «Tobyly» búgin «Atyraýdy» 3:1 esebimen jeńip, 12 upaımen kósh basyna shyqty. Ekinshi oryndaǵy «Tarazdyń» 10 upaıy bar. Olar, keshe «Maqtaralmen» 1:1 esebimen teń oınady.
S tobynda shırek fınalǵa 10 upaımen «Astana» men «Qaısar» shyqty. Altynshy týrda «Astana» «Aqtóbemen» 1:1 esebimen teń tússe, «Qaısar» «Aqjaıyqtan» 3:0 esebimen basym tústi.
Ázirge A tobynda alǵashqy eki oryndaǵy komanda anyqtala qoıǵan joq. Dese de shırek fınalǵa shyǵýdan «Shahter», «Qyzyljar» jáne «Ordabasy» klýbtarynyń úmiti bar.
Keshe keıinge qaldyrylǵan besinshi týr oıynynda «Shahter» «Ordabasyny» 3:0 esebimen jeńdi. Bul topta altynshy týrda 17 tamyzda «Qyzyljar» (Petropavl) men «Shahter» (Qaraǵandy), «Ordabasy» (Shymkent) men SDıÝShOR №8 (Nur-Sultan) kezdesedi.
Ázirge shırek fınalda eki jup belgili boldy. Jarystyń atalǵan satysynda «Astana» men «Kaspıı», «Qaırat» pen «Qaısar» komandalary sheberlik baıqasady. Qalǵan eki jup 17 tamyzdaǵy «Qyzyljar» men «Shahter» kezdesýinen keıin belgili bolady.
Shırek fınaldyń alǵashqy oıyny 21, 22 tamyz kúnderine belgilense, qarymta kezdesý 22 qyrkúıekte ótedi.
