Fýtboldan Qazaqstan kýbogy: «Qaırat» óz alańynda «Kaspııden» jeńilip qaldy
NUR-SULTAN. QazAqparat - Búgin fýtboldan Qazaqstan kýbogy toptyq kezeńi ekinshi týrynda Almatynyń «Qaıraty» óz alańynda aqtaýlyq «Kaspııden» jeńilip qaldy, dep habarlaıdy QazAqparat tilshisi.
Kezdesý barysynda «Qaırat» jasyl alańǵa negizinen jastardy shyǵardy. Al «Kaspıı» tájirıbeli oıynshylaryna senim artty. Aqtaýlyq klýbtan 39-mınýtta Nıkola Tsýtskıch esep ashty. Ekinshi kezeńniń 54-mınýtynda Alekseı Zeleskıı esepti ústemeleı tústi. Nátıjesinde «Kaspıı» syrt alańda qarsylasynan 2:0 esebimen basym tústi.
Birinshi topta oıyn kórsetetin Túrkistan oblysynyń «Maqtaraly» óz alańynda «Tarazǵa» 1:2 esebimen jeńildi. Kezdesýde alań ıelerinen Edige Oralbaı 16-mınýtta esep ashqan bolatyn. Degenmen maqtaraldyq Marlen Aımanov 28-mınýtta avtogol avtory atanyp, tarazy basy teńesti. Al 41-mınýtta tarazdyq Ýrosh Nenadovıch mergendik tanytyp, kezdesý núktesin qoıdy.
Oralda jergilikti «Aqjaıyq» óz alańynda Qyzylordanyń «Kaısaryn» qabyldaǵan bolatyn. Eki komanda 0:0 esebine qanaǵat bildirdi.
Eske salsaq, 16 shildede «Astana» «Aqtóbeni», «Shahter» «Qyzyljardy» 3:2 esebimen jeńse, «Tobyl» «Atyraýdy» 2:0 esebimen tize búktirdi.
Endi 18 shildede №8 BJMORSM (Nur-Sultan) men «Ordabasy» (Shymkent), «Turan» (Túrkistan) men «Jetisý» (Taldyqorǵan) ekinshi týrdy túıindeıdi.
Aıta ketsek, bıyl atalǵan doda jańa talaptar boıynsha oınalady.
Toptyq kezeńde Premer-lıganyń 14 komandasy men irikteý kezeńinen irkilmeı ótken birinshi lıganyń eki klýby tórt topqa bólingen.
