Fýtboldan Qazaqstan kýbogy: «Astana» shırek fınalǵa joldama aldy
NUR-SULTAN. QazAqparat - Elordalyq «Astana» fýtboldan Qazaqstan kýbogy shırek fınalyna joldama aldy, dep habarlaıdy QazAqparat tilshisi.
«Astana» altynshy týrda syrt alańda «Aqtóbe» komandasymen 1:1 teń tústi. Jeńilgen jaǵdaıda elordalyq klýb shırek fınalǵa shyǵýdan shet qalatyn. Oıynnyń 15-mınýtynda aqtóbelik Maksım Samorodov esep ashsa, 85-mınýtta «Astana» oıynshysy Marın Tomasov tarazy basyn teńestirdi.
Nátıjesinde «Astana» S tobynda birinshi oryn aldy. Ekinshi oryn Qyzylordanyń «Qaısar» komandasyna buıyrdy. Olar keshe, 14 tamyzda óz alańynda «Aqjaıyqty» 3:0 esebimen jeńdi.
Sondaı-aq, keshe «Taraz» ben «Maqtaral» 1:1 esebimen teń oınasa, «Jetisý» «Turannan» 1:0 esebimen basym tústi.
Al sol kúni keıinge qaldyrylǵan besinshi týr oıynynda Qaraǵandynyń «Shahteri» Shymkenttiń «Ordabasy» klýbyn 3:0 esebimen oısyrata jeńdi.
Búgin «Atyraý» men «Tobyl» (Qostanaı), «Kaspıı» (Aqtaý) men «Qaırat» (Almaty) komandalary kezdesýde.
Al 17 tamyzda «Qyzyljar» (Petropavl) men «Shahter» (Qaraǵandy), «Ordabasy» (Shymkent) men SDıÝShOR №8 (Nur-Sultan) altynshy týrdy túıindeıdi.