Fýtboldan Qazaqstan kýbogynyń shırek fınalyna shyqqan komandalar anyqtaldy
ASTANA. KAZINFORM - Fýtboldan Qazaqstan kýbogynyń shırek fınalyna joldama alǵan barlyq komanda belgili boldy.
Sońǵy eki joldamaǵa Semeıdiń «Elimaı» jáne «Aqtóbe» komandalary ıe boldy.
Semeılik klýb birinshilikte sońǵy orynnyń birinde kele jatqan Qaraǵandynyń «Shahterimen» sheberlik baıqasty. Óz alańynyń daıyn bolmaýyna baılanysty «Elimaı» bul oıyndy Pavlodar qalasynda ótkizýge májbúr boldy.
Premer-lıgaǵa bıyl qaıta qosylǵan semeılik komanda óz quramyna tájirıbeli fýtbolshylardy qosty. Birinshilikte ázirge táp-táýir nátıjege qol jetkizip keledi. Dese de búgingi kezdesýde olardyń tarapynan jankúıer kóńilinen shyǵarlyq oıyn baıqala qoıǵan joq. Oıynnyń 50-mınýtynda «Elimaı» sapynan Shına mergendik tanytsa, 73-mınýtta qaraǵandylyq klýbtan Dmıtrıı Bachek tarazy basyn teńestirdi. Oıynnyń 87-mınýtynda Ivan Svırıdov semeılik komandanyń jeńis golyn soqty. Osylaısha «Elimaı» «Shahterden» 2:1 esebimen basym túsip, shırek fınalǵa joldama aldy.
Al, «Aqtóbe» men «Jetisý» arasyndaǵy kezdesý taǵdyryn jalǵyz gol sheshti. Ony 44 -mınýtta Dmıtrıı Bessmertnyı óziniń enshisine jazdy. Nátıjesinde qarsylasyn 1:0 esebimen jeńgen «Aqtóbe» jarysty jalǵastyrýǵa múmkindik aldy.
Eske salsaq, budan buryn fýtboldan Qazaqstan kýbogy oıyndary aıasynda «Tobyl» «Qaısardy», «Qaırat» «Turandy» 3:0 , «Atyraý» SD Family klýbyn 6:0, «Astana» «Jeńisti» 1:0, «Ordabasy» «Tarazdy» 2:0, «Qyzyljar» «Ońtústik akademııany» 2:1 esebimen jeńdi.
Endi shırek fınalda «Tobyl» men «Astana», «Atyraý» men «Qaırat»,«Ordabasy» men «Aqtóbe», «Qyzyljar» men «Elimaı» sheberlik baıqasady.