Fýtboldan Qazaqstan kýbogi: «Astana» jarys jolynan shyǵyp qaldy
NUR-SULTAN. QazAqparat - Búgin elimizdiń segiz qalasynda fýtboldan Qazaqstan kýbogi 1/8 fınaldyq kezeńi oıyndary ótti, dep habarlaıdy QazAqparat tilshisi.
Elordalyq «Astana» jarys jolynan shyǵyp qaldy. Olar syrt alańda Semeıdiń «Altaı» komandasyna jol berdi. Aıta keterligi, bul kezdesýde elordalyq klýb sapynda negizinen jastar oıyn kórsetti. Kezdesýdiń negizgi kezeńi 1:1 esebimen teń aıaqtaldy. «Astana» sapynan 25-mınýtta Serikjan Mýjıkov esep ashqan edi. Oǵan 66-mınýtta «Altaı» oıynshysy Ánýar Omashev bir golmen jaýap qaıyrdy. Oıyn qosymsha kezeńge ulasty. Munda da jeńimpaz anyqtalǵan joq. Penaltı tebýde «Altaı» 15:14 esebimen jeńiske jetti.
Almatynyń «Qaıraty» da osyndaı qarsylyqqa tap boldy. Olarǵa birinshi lıgada oıyn kórsetetin Aqtaýdyń «Kaspıı» komandasy qarsylas atanǵan edi. «Qaırat» sapynan 18-mınýtta Sultanbek Astanov gol soqsa, «Kaspıı» oıynshysy Rınat Haırýllın 58-mınýtta tarazy basyn teńestirdi. Oıyn sońynday penaltı tebýde 6:5 esebimen almatylyq komandanyń joly boldy.
Qostanaıdyń «Tobyly» syrt alańda Pavlodardyń «Aqsý» klýbyn 3:0 esebimen jeńip qaıtty. Bul oıynda qostanaılyqtar qatarynan 49 jáne 66-mınýttarda Baýyrjan Turysbek, 68-mınýtta Azat Nurǵalıev gol soqty.
«Aqtóbe» komandasy Pavlodardyń «Ertis» klýbyn Qostanaıda qabyldady. Aqtóbedegi stadıonnyń daıyn bolmaýyna baılanysty olar óz alańyndaǵy oıyndaryn atalmysh qalada ótkizip júr. Búgin kezdesýde negizgi kezeń 2:2 esebimen teń aıaqtaldy. «Aqtóbeden» Abat Aıymbetov 27, 64-mınýttarda gol soqsa, «Ertisten» Roher Kanıas 17, Stanıslav Lýnın 51-mınýttarda kózge tústi. Qosymsha kezeńde pavlolarlyq Kaspars Dýbra «Ertisti» alǵa shyǵardy. Degenmen «Aqtóbe» komandasynan 111-mınýtta Hrvoe Mılıshevıch qaıtadan tarazy basyn teńestirdi. Penaltı tebýde «Ertistiń» joly boldy.
Qyzylordanyń «Qaısary» birinshi lıgada oıyn kórsetetin Shymkenttiń «Ońtústik akademııa» klýbyn áreń jeńdi. «Ońtústik akademııa» klýbynan 26-mınýtta Jandos Qýandyqov esep ashqanymen, oǵan «Qaısar» sapynan 31-mınýtta Ivan Sadovnıchıı jaýap qaıyrdy. Oıynnyń negizgi kezeńi 1:1 esebimen teń aıaqtaldy. Qosymsha kezeńniń 106-mınýtta qyzylordalyq shabýylshy Branıslav Pýnoshevats soqqan gol «Qaısardy» jarystyń kelesi kezeńine alyp shyqty.
Kókshetaýdyń «Oqjetpesi» men Shymkenttiń «Ordabasy» arasyndaǵy kezdesý taǵdyryn bir ǵana gol sheshti. Shymkenttik Temirlan Erlanovtyń 75-mınýtta soqqan jalǵyz goly óz komandasyn shırek fınal oıyndaryna alyp shyqty.
«Atyraý» komandasy Nur-Sultan qalasynda Taldyqorǵannyń «Jetisýyn» 1:0 esebimen jeńdi. Kezdesý taǵdyryn sheshken goldy 78-mınýtta atyraýlyq Alekseı Rodıonov soqty.
«Taraz» óz alańynda Qaraǵandynyń «Shahterin» 2:0 esebimen jeńdi. Atalmysh komanda sapynan 8-mınýtta Gavrıl Kan men 91-mınýtta Serj Nıýadzı kózge tústi.
Qazaqstan kýbogynyń shırek fınal oıyndary 8 mamyrda ótkiziledi. Jarystyń bul kezeńi de bir ǵana kezdesýden turady.
