Fýtboldan Qazaqstan chempıonatynyń úshinshi týr oıyndary bastaldy
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan chempıonatynyń úshinshi týr oıyndary bastaldy. Elimizdiń úsh qalasynda qazaqstandyq klýbtar ózara sheberlik baıqasty, dep habarlaıdy QazAqparat tilshisi.
Úshinshi týrdyń alǵashqy oıyny Pavlodar qalasynda ótti. Jergilikti «Ertis» Qyzylordanyń «Qaısaryn» qabyldady. Búgingi kezdesýde eki komanda da teń deńgeıde oıyn kórsetti. Kezdesý taǵdyryn 91-mınýtta «Qaısardyń» jartylaı qorǵaýshysy Maqsat Baıjanov soqqan jalǵyz gol sheship, qyzylordalyq klýb bıylǵy dop dodasyndaǵy alǵashqy jeńisine qol jetkizdi.
Bıyl Premer-lıgaǵa qaıta oralǵan «Taraz» komandasy da alǵashqy eki týrdaǵy sátsizdikten keıin jeńiske jetti. Bul joly olar óz alańynda «Atyraý» komandasynan 2:0 esebimen basym tústi. Tarazdyqtar qatarynan Elgýdja Lobjanıdje 71, Serj Nıýadzı 78-mınýtta qarsylas komanda qaqpasynan sańylaý tapty.
Elordanyń «Astana» klýby qatarynan úshinshi márte jeńiske jetti. Elordalyq fýtbolshylar sapynan 26-mınýtta Marın Anıchıch esep ashsa, 58-mınýtta onyń áriptesi Dorın Rotarıý esepti ulǵaıtty. Oıynda «Astana» 2:0 esebimen jeńiske jetip, týrnır kestesinde jeke-dara kósh basyna shyqty.
Úshinshi týrdyń qalǵan oıyndary 31 naýryzda oınalady. Bul kúni «Aqtóbe» men «Qaırat», «Shahter» men «Tobyl», «Oqjetpes» pen «Ordabasy» komandalary kezdesedi.
Al tórtinshi týr oıyndary 6 jáne 7 sáýir kúnderi bolady. 6 sáýirde «Tobyl» men «Aqtóbe», «Ordabasy» men «Jetisý», «Qaısar» men «Astana», «Qaırat» pen «Oqjetpes», «Ertis» pen «Taraz» komandalary kezdesse, 7 sáýirde «Atyraý» men «Shahter» klýbtary sheberlik baıqasady.
