Fýtboldan Qazaqstan chempıonatynda «Taraz» «Shahterdi» tize búktirdi
NUR-SULTAN. QazAqparat – Fýtboldan Qazaqstan chempıonatynyń altynshy týrynda «Taraz» óz alańynda Qaraǵandynyń «Shahterin» qabyldady, dep habarlaıdy QazAqparat tilshisi.
Ótken týrda qaraǵandylyqtar «Maqtaaraldy» 5:1 esebimen utsa, tarazdyqtar elordada «Astanaǵa» ese jibergen edi – 1:2.
Bul joly qos komanda quramynda azdaǵan ózgerister boldy.
Birinshi taımda esep ashylmasa, oıynnyń ekinshi kezeńi áldeqaıda tartysty ótti. 58-mınýtta Baýyrjan Baıtananyń ádemi pasynan keıin tarazdyq Abylaıhan Jumabek esep ashty – 1:0. Sodan keıin 78-mınýtta B.Baıtananyń taǵy bir tamasha pasyn Ádilet Keńesbek múlt jibermedi – 2:0.
Match sońynda 97-mınýtta Aıdos Táttibaev 11 metrlik aıyp dobyn dál oryndap, esepti qysqartty. Sosyn «Shahter» sapynan dórekiligimen kózge túsken Mıhaıl Gabyshev alańnan qýyldy.
Qorytyndy esep – 2:1, «Tarazdyń» paıdasynda.
Bul oıynnan keıin 8 upaı jınaǵan «Taraz» jetinshi orynǵa kóterildi.
Chempıonattaǵy alǵashqy jeńilistiń dámin tatqan «Shahter» 10 upaımen 4-orynda qaldy.
Kelesi týrda 21 sáýir kúni «Taraz» syrt alańda «Aqsýmen» oınasa, «Shahter» Qaraǵandyda Oraldyń «Aqjaıyǵyn» qabyldaıdy.
Búgin sondaı-aq «Maqtaaral» «Aqsýdy» 2:1 esebimen utyp, bıylǵy maýsymdaǵy tyrnaqaldy jeńisine qol jetkizdi.
Birinshilikte jeńilmegen bir komanda – «Qaırat» qana qaldy.
Eske sala keteıik, budan buryn fýtboldan Qazaqstan chempıonatynda «Aqjaıyqtyń» «Astanadan» basym túskenin, «Qaısardyń» qaıta kósh basyna shyqqanyn jazǵan bolatynbyz.
Sondaı-aq «Tobyl» men «Qaırat» teń oınady.
