Fýtboldan Qazaqstan chempıonatynda "Taraz" kósh bastady
NUR-SULTAN. QazAqparat - Búgin, 9 cáýirde fýtboldan Premer-lıga komandalary arasyndaǵy el birinshiliginiń tórtinshi týryndaǵy alǵashqy oıyn aıaqtaldy, dep habarlaıdy QazAqparat tilshisi.
Alǵashqy oıynda «Taraz» óz alańynda Qaraǵandynyń «Shahter» komandasyn qabyldady. Alań ıeleri qarsylastar qaqpasyna jaýapsyz tórt gol soqty.
Aldymen Feıt Fraıder Obılor 29, 44-mınýttarda mergendigimen kózge tústi. Al ekinshi kezeńniń 51-mınýtynda «Taraz» sapynan Pedro Eýjenıo taǵy bir gol soqsa, Nenad Adamovıch 90-mınýtta kezdesý núktesin qoıdy. Osylaısha tarazdyqtar qarsylasyn 4:0 esebimen tize búktirdi.
Atalǵan jeńisinen keıin «Taraz» týrnır kestesinde on upaımen kósh basyna shyqty. Olardyń enshisinde eki jeńis, eki teń oıyn bar.
Atalǵan týrda dál qazir Oralda jergilikti «Aqjaıyq» pen Petropavldyń «Qyzyljary» sheberlik baıqasýda. Ázire esep 0:0.
Sondaı-aq, búgin 18.00-de Qyzylordada «Qaısar» men Aqtaýdyń «Kaspııi» jasyl alańǵa shyǵady. Búgingi oıyndardy 19.00-de «Aqtóbe» men Shymkenttiń «Ordabasy» komandalary qorytyndylaıdy.
Erteń 10 sáýirde Taldyqorǵanda jergilikti «Jetisý» men Qostanaıdyń «Tobyl» klýbtary kezdesse, Almatyda «Qaırat» pen Túrkistannyń «Turan» klýbtary oınaıdy. Atalǵan týrdaǵy sońǵy oıyn 19.00-de elordada «Astana» men «Atyraý» arasynda bolady.
