Fýtboldan Qazaqstan chempıonatynda komandalar sany qysqardy
ASTANA. 3 qańtar. QazAqparat - 2013 jyly fýtboldan Qazaqstan chempıonatyna 12 komanda qatysady.
Mundaı sheshim 2 qańtar kúni Almatyda ótken Qazaqstan fýtbol federatsııasynyń (QFF) Atqarýshy komıtetiniń otyrysynda qabyldandy.
QFF-tyń saıtynda málim etilgendeı, bekitilgen klýbtar tiziminde "Shahter" (Qaraǵandy), "Ertis" (Pavlodar), "Aqtóbe" (Aqtóbe), "Taraz" (Taraz), "Astana" (Astana), "Tobyl" (Qostanaı), "Ordabasy" (Shymkent), "Aqjaıyq" (Oral), "Qaırat" (Almaty), "Atyraý" (Atyraý), "Jetisý" (Taldyqorǵan) jáne "Shyǵys" (Óskemen) bar.
Osylaısha, ótken maýsymmen salystyrǵanda qatysýshy komandalardyń sany eki komandaǵa qysqardy. Bıyl úzdik atanýǵa «Oqjetpes» (Kókshetaý) pen «Qaısar» (Qyzylorda) baq talastyra almaıdy.
QFF-tan atap ótkendeı, «Qaısar» qatysýshylardyń tiziminen «Atqarýshy komıtettiń erejelerin oryndamaýy» sebepti alynyp tastaldy. Kásipqoı fýtbol lıgasynyń tóraǵasy Mıhaıl Gýrmannyń aıtýynsha, qyzylordalyq klýbtyń basshylyǵy chempıonatqa qatysýǵa qarjylyq kepildemelerdi usynbady jáne aǵymdaǵy qaryzyn ótemedi.
Al «Oqjetpes» komandasynyń qatyspaýy týraly Qazaqstan fýtbol federatsııasynyń saıtynda eshteńe aıtylmady.
