Fýtboldan Qazaqstan chempıonatynda «Kaspıı» qaıtadan kósh bastady
NUR-SULTAN. QazAqparat – Fýtboldan Qazaqstan chempıonatynyń onynshy týrynda Aqtaýdyń «Kaspııi» «Aqtóbeni» qabyldady, dep habarlaıdy QazAqparat tilshisi.
Ótken týrda aqtaýlyqtar syrt alańda «Aqsýdan» utylyp qalsa, aqtóbelikter «Aqjaıyqty» jeńgen edi. Oǵan qosa, «Aqtóbe» Aqtaýǵa jańa bas bapker Andreı Karpovıchpen keldi.
Birinshi taımda alań ıeleri kóbirek shabýyldaǵanymen, esep ashylǵan joq.
Ekinshi taımda qonaqtar belsendi bolǵanmen, 71-mınýtta Ioahım Adýkor ekinshi eskertý qaǵazyn alyp, alańnan qýyldy. Sol-aq eken, 80-mınýtta buryshtamadan berilgen doptan keıin «Kaspıı» quramyndaǵy ýkraınalyq legıoner Artem Baranovskıı esep ashty. 89-mınýtta alańǵa tyńnan qosylǵan Erkebulan Nurǵalıev esepti 2:0-ge jetkizdi.
Osylaısha, 19 upaı jınaǵan «Kaspıı» týrnır kestesinde qaıtadan birinshi orynǵa shyqty.
Kelesi týrda 14 mamyrda «Aqtóbe» el chempıony Qostanaıdyń «Tobylyn» qabyldasa, bir kúnnen keıin aqtaýlyqtar syrt alańda «Maqtaaralmen» kezdesedi.
Eske sala keteıik, budan buryn fýtboldan el chempıonatynda «Aqtóbeniń» «Aqjaıyqty» utqanyn, Qazaqstan ulttyq quramasyna jańa bas bapker taǵaıyndalǵanyn jazǵan bolatynbyz. Sondaı-aq, «Aqjaıyq» pen «Maqtaaral» teń tarqasty .
