Fýtboldan Qazaqstan chempıonatynda «Aqjaıyq» «Astanadan» basym tústi

ORAL. QazAqparat – Fýtboldan Qazaqstan chempıonatynyń altynshy týrynda Oraldyń «Aqjaıyǵy» óz alańynda «Astanany» qabyldady, dep habarlaıdy QazAqparat tilshisi.

Astanalyqtar 9 upaımen týrnır kestesinde besinshi orynda tursa, oraldyqtar (4 upaı) 11-satyda edi.

Buǵan deıin qarsylastar ózara 16 kezdesý ótkizip, sonyń 13-inde elordalyqtar jeńiske jetken edi. Batysqazaqstandyqtar enshisinde bir ǵana utys bolsa, eki oıyn teń aıaqtalǵan edi.

Ótken týrda «Atyraýdy» qapy qaldyrǵan «Aqjaıyq» sol qurammen alańǵa shyqty. «Astana» sapynda azdaǵan ózgeris boldy.

Birinshi taımda qonaqtar kóbirek shabýyldaǵanymen, 27-mınýtta buryshtamadan berilgen doptan keıin «Aqjaıyq» quramyndaǵy ýkraınalyq Maksım Kalenchýk esep ashty – 1:0.

Ekinshi taımda qos komandada gol soǵatyn múmkindikter bolǵanymen, esep ózgergen joq.

Osylaısha «Aqjaıyq» qatarynan ekinshi jeńisine qol jetkizip, týrnır kestesinde 7 upaımen toǵyzynshy orynǵa kóterildi. Reseılik qaqpashy Stepan Sıkach úsh match qatarynan óz qaqpasynyń kiltin berik ustady.

Jetinshi týrda 20 sáýirde astanalyqtar Aqtaýdyń «Kaspııin» qabyldasa, «Aqjaıyq» 21-inde syrt alańda «Shahtermen» sheberlik baıqasady.

Eske sala keteıik, budan buryn «Aqjaıyqtyń» syrt alańda «Atyraýdy» utqanyn jazǵan bolatynbyz.

Sýretterdi túsirgen Aıbatyr Nurash