Fýtboldan Qazaqstan chempıonatynda Aqtóbe Astanadan bes upaıǵa uzap ketti
NUR-SULTAN. QazAqparat – Fýtboldan Qazaqstan chempıonatynyń 20-týrynda «Aqtóbe» óz alańynda «Taraz» komandasyn qabyldady, dep habarlaıdy QazAqparat tilshisi.
Ótken týrda «Maqtaaralmen» teń túsken aqtóbelikter burynǵysha kósh basynda kele jatqanymen, ekinshi oryndaǵy «Astana» komandasyn jaqyndatyp alǵan-dy.
Búgin elordalyqtar óz alańynda Qazaqstan chempıony «Tobyldan» utylǵannan keıin «Aqtóbege» upaı aıyrmashylyǵyn qaıta ulǵaıtýǵa múmkindik týdy.
Ótken týrda Tarazda «Aqsýǵa» ese jibergen tarazdyqtarǵa da upaı aýadaı qajet edi. Sondyqtan match barynsha tartysty órbidi.
Oıyn alań ıeleriniń basymdylyǵymen ótkenimen, kópke deıin esep ashylmady. Tek 72-mınýtta ǵana reseılik legıoner Serder Serderov qaqpa mańyndaǵy qarbalas sátti paıdalana bildi.
Osylaısha, 1:0 esebimen jeńiske jetken «Aqtóbe» upaı sanyn 42-ge jetkizdi. Sóıtip astanalyqtardan 5 upaıǵa uzap ketti.
Jıyrmasynshy týrdyń qalǵan kezdesýleri erteń jalǵasady.
Eske sala keteıik, budan buryn fýtboldan el chempıonatynda «Aqjaıyqtyń» «Shahterge» ese jibergenin jazǵan bolatynbyz.
Sondaı-aq «Astana» óz alańynda «Tobyldan» jeńildi .
