Fýtboldan Qazaqstan chempıonaty: «Tobyl» «Atyraýdan» basym tústi
NUR-SULTAN. QazAqparat - Fýtboldan Premer-lıga komandalary arasyndaǵy el birinshiliginiń 22-týry máresine jetti, dep habarlaıdy QazAqparat tilshisi.
Atalǵan týrda jankúıerler Qostanaıdyń «Tobyl» komandasynyń syrt alańdaǵy «Atyraýmen» kezdesýine kóz tikti.
Bul oıynda qostanaılyq klýb teń túsken nemese jeńilgen jaǵdaıda chempıondyqtan úmit úzýine týra keletin edi.
Óıtkeni, qazir «Astana» men «Tobyl» altyn júldege talasyp otyr.
«Astana» búgin elordada «Taraz» komandasyn qabyldady. Qarsylasyn 3:0 esebimen jeńip, týrnır kestesinde «Tobyldan» tórt upaıǵa uzap ketti.
Sondyqtan qostanaılyq klýbqa búgin teń jeńis qajet bolatyn.
Oıyn barysynda olardyń qatarynan Aleks Amanovıchtiń 18-mınýtta soqqan jalǵyz goly «Tobylǵa» jeńis alyp keldi.
Osylaısha olar qarsylasynan 1:0 esebimen basym tústi. Týrnır kestesinde 49 upaımen ekinshi orynǵa berik ornyqty.
Sondaı-aq, búgin «Ordabasy» men «Kaspıı», «Aqjaıyq» pen «Qaısar» 1:1 esebine qanaǵat bildirdi.
Al 26 qyrkúıekte Almatynyń «Qaıraty» syrt alańda Qaraǵandynyń «Shahterimen» 1:1 esebimen teń tústi.
Túrkistannyń «Turany» syrt alańda Petropavldyń «Qyzyljaryn» 1:0 esebimen tize búktirse, óz alańynda «Aqtóbe» Taldyqorǵannyń «Jetisýynan» 2:0 esebimen basym tústi.
Endi 23-týr oıyndary 2 jáne 3 qazan kúnderi ótkiziledi.
