Fýtboldan Qazaqstan chempıonaty oıyndarynyń kestesi jarııalandy
NUR-SULTAN. QazAqparat - Búgin fýtboldan Qazaqstan chempıonaty qaıta jalǵasady, dep habarlaıdy QazAqparat tilshisi.
Bul jóninde Qazaqstan kásipqoı fýtbol lıgasy málim etti. Lıga saıtynda 18-30 tamyz kúnderi aralyǵynda ótetin oıyn kestesi jarııalandy.
Esterińizge sala ketsek, elimizde koronavırýs ınfektsııasy aldyn alý maqsatynda aldaǵy oıyndar Almaty jáne Talǵar qalalaryndaǵy tórt stadıonda ótkiziledi.
Atalǵan týrdaǵy úsh oıyn 18, bireýi 19 tamyz kúni bolady. Atap aıtqanda, 18 tamyzda Aqtaýdyń «Kaspıı» jáne Almatynyń «Qaırat» (Talǵar. Oqý-jattyǵý bazasy. 17.00) klýbtary sheberlik baıqasady. Sol kúni Taldyqorǵannyń «Jetisý» jáne Shymkenttiń «Ordabasy» (Almaty. Ortalyq stadıon. 19.00), Jambyl oblysynyń «Taraz» jáne Petropavldyń «Qyzyljar» (Almaty. «Jas qyran» stadıony. 21.00) komandalary jasyl alańǵa shyǵady.
Al 19 tamyzda Qaraǵandynyń «Shahter» jáne Qyzylordanyń «Qaısar» (Almaty. T.Segizbaev atyndaǵy stadıon. 18.00) bolady. Bul týrdaǵy Qostanaıdyń «Tobyl» jáne elordalyq «Astana» klýbtarynyń kezdesýi keıinge qaldyryldy. Sebebi, 18 tamyzda «Astana» Chempıondar lıgasy birinshi kezeńinde syrt alańda Belarýstiń «Dınamo» (Brest) klýbymen jarystyń ekinshi satysyna beriletin jalǵyz joldama úshin talasady.
Esterińizge sala ketelik, qazirge deıin elimizde úsh týr oıyndary ótkizildi. Alǵashqy eki týrdan keıin koronavırýs ınfektsııasyna baılanysty chempıonat belgisiz merzimge keıinge shegerildi. Odan keıin 1 shildede úshinshi týr ótkizilip, elimizde karantın sharalarynyń kúsheıtilýine baılanysty qalǵan oıyndar taǵy da keıinge shegerildi.
