Fýtboldan Qazaqstan chempıonaty: «Qaısar» «Shahterden» basym tústi
NUR-SULTAN. QazAqparat - Búgin fýtboldan Qazaqstan chempıonaty tórtinshi týrynyń taǵy bir oıyny ótti, dep habarlaıdy QazAqparat tilshisi.
Atalǵan týrdaǵy tórtinshi oıynda Qaraǵandynyń «Shahter» jáne Qyzylordanyń «Qaısar» komandalary kezdesti. Ekeýi de týrnır kestesinde qatar keledi. Sondyqtan kezdesýdiń tartysty ótetini belgili edi.
Oıyn taǵdyryn qyzylordalyq klýb sapynan 57-mınýtta Aleksandr Marochkın soqqan jalǵyz gol sheshti. Budan keıin eki komanda sapynan da esepti ózgertetin birneshe múmkindik boldy. Dese de tablodaǵy esep ózgergen joq.
Esterińizge sala ketelik, budan buryn úsh oıyn ótkizildi. Aqtaýdyń «Kaspııi» Almatynyń «Qaıratynan» 0:3, Taldyqorǵannyń «Jetisýy» Shymkenttiń «Ordabasysynan» 2:3 esebimen jeńilse, Jambyl oblysynyń «Taraz» jáne Petropavldyń «Qyzyljar» komandalary 0:0 esebimen teń tarqasty.
Bul týrdaǵy Qostanaıdyń «Tobyl» jáne elordalyq «Astana» klýbtarynyń kezdesýi keıinge qaldyryldy.
Endi besinshi týr 21 jáne 22 tamyz kúnderi ótedi. 21 tamyzda «Ordabasy» men «Kaspıı», «Qaırat» jáne «Tobyl», 22 tamyzda «Astana» men «Oqjetpes», «Qyzyljar» men «Shahter», «Qaısar» men «Jetisý» komandalary kezdesedi.
