Fýtboldan Qazaqstan chempıonaty: «Qaırat» tórtinshi márte jeńiske jetti
NUR-SULTAN. QazAqparat - Búgin fýtboldan Qazaqstan chempıonaty qaıta jalǵasty, dep habarlaıdy QazAqparat tilshisi.
Tórtinshi týrdaǵy alǵashqy kezdesý Aqtaýdyń «Kaspıı» jáne Almatynyń «Qaırat» komandalary arasynda ótkizildi.
Bul oıyn karantındik sharalarǵa baılanysty Almaty oblysy Talǵar qalasyndaǵy oqý-jattyǵý bazasynda boldy.
Alǵashqy úsh týrda jaqsy nátıjege qol jetkizgen «Qaırat» bul joly da súringen joq. Qarsylastar qaqpasyna úsh gol soǵyldy. Oıynnyń 9-mınýtynda almatylyq komanda oıynshysy Nuráli Álip penaltı arqyly óz klýbyn alǵa shyǵardy. Ol 52-mınýtta esepti ústemeleı tústi. Al 82-mınýtta «Qaırattyń» taǵy bir oıynshysy Artýr Shýshenachev qorytyndy esepti belgiledi. Osylaısha, «Qaırat» 3:0 esebimen jeńiske jetti. Komanda týrnır kestesinde 12 upaımen kósh basynda tur.
Sondaı-aq, búgin Taldyqorǵannyń «Jetisý» jáne Shymkenttiń «Ordabasy», Jambyl oblysynyń «Taraz» jáne Petropavldyń «Qyzyljar» komandalary jasyl alańǵa shyǵady.
Al 19 tamyzda Qaraǵandynyń «Shahter» jáne Qyzylordanyń «Qaısar» komandalary arasyndaǵy kezdesý bolady. Bul týrdaǵy Qostanaıdyń «Tobyl» jáne elordalyq «Astana» klýbtarynyń kezdesýi keıinge qaldyryldy.
