Fýtboldan Qazaqstan chempıonaty qashan jalǵasady
NUR-SULTAN. QazAqparat – Qazaqstan kásipqoı fýtbol lıgasy - OLIMPBET fýtboldan Qazaqstan chempıonatynyń jańarǵan kúntizbesin usyndy, dep habarlaıdy QazAqparat lıganyń resmı saıtyna silteme jasap.
Mádenıet jáne sport mınıstrliginiń kelisimimen el chempıonaty 2020 jyldyń 1 shildesinen bastap jalǵasady. Chempıonatty jalǵastyrýdyń basty sharty – oıyn kezinde koronavırýstyń taralýyna jol bermeý, aldyn alýdyń arnaıy nusqaýlyǵyn saqtaý.
«Atalǵan arnaıy qujatqa engizilgen sanıtarlyq talaptar respýblıkanyń birneshe oblysyndaǵy turaqsyz epıdemıologııalyq jaǵdaıǵa baılanysty kúsheıtildi. Oıyndar kórermensiz ótedi, jarys kezinde qyzmet etetin adamdardyń sany shekteýli bolady. Týrnır kúntizbesin Qazaqstan fýtbol federatsııasy atqarýshy komıtetiniń músheleri bekitti. Birinshi jáne Ekinshi lıga komandalary arasyndaǵy birinshilikter jáne QR Kýbogy 2020 jyldyń 1 tamyzynan keıin bastalady» delingen Qazaqstan kásipqoı fýtbol lıgasy taratqan aqparatta.
Sonymen qatar, «Astana» klýby Chempıondar Lıgasynyń alǵashqy irikteý kezeńin 2020 jyldyń 18-19 tamyzynda bastaıdy. Osy jyly irikteý kezeńiniń ótkizilý júıesinde aıtarlyqtaı ózgerister bar. Pleı-off kezeńine deıingi barlyq kezdesýler bir ǵana oıynnyń nátıjesinde sheshiledi.
Alǵashqy kezeńniń jerebesi 9 tamyz kúni ótedi. Dál osy kúni elordalyq klýb oıynnyń qaıda ótetinin jáne qaı komandaǵa qarsy oınaıtynyn naqty biledi.
Fýtboldan Qazaqstan chempıonatynyń kúntizbesin myna siltemeden kórýge bolady.
Buǵan deıin fýtboldan Qazaqstan birinshiligin jalǵastyrýdyń eki jospary usynylǵany habarlanǵan edi.
