Fýtboldan Qazaqstan chempıonaty: Astana Turanmen teń tústi
ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 21-týry máresine jetti, dep habarlaıdy QazAqparat tilshisi.
Atalǵan týrdy búgin «Turan» (Túrkistan) men «Astana» komandalary túıindedi. Oıyn barysynda alań ıelerinen Baqdáýlet Zýlfıkarov 46, Artem Gýrenko 62-mınýttarda mergendik tanytsa, oǵan astanalyq klýbtan Abat Aıymbetov 82, Marın Tomasov 95-mınýtta eki golmen jaýap qaıyrdy.
Osylaısha komandalar 2:2 esebine qanaǵat bildirdi.
Búgin kósh basynda kele jatqan «Aqtóbe» syrt alańda Oraldyń «Aqjaıyǵyna» 1:3 esebimen jol berdi.
Sondaı-aq, Qostanaıdyń «Tobyly» óz alańynda Qaraǵandynyń «Shahterin» 3:1 esebimen jeńse, Petropavldyń «Qyzyljary» Almatynyń «Qaıratyna» 1:2 esebimen ese jiberdi.
Aıta ketsek, 1 qazanda atalǵan týrda úsh oıyn ótkizildi. Aqtaýdyń «Kaspııi» óz alańynda Pavlodar oblysynyń «Aqsýyn» 1:0, «Ordabasy» Shymkentte «Atyraýdy» 2:0 esebimen tize búktirdi.
Al «Taraz» óz alańynda túrkistandyq «Maqtaralǵa» 0:1 esebimen utyldy .
