Fýtboldan Qazaqstan chempıonaty: Alǵashqy kúni 4 match ótti
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń on besinshi týrynyń alǵashqy oıyn kúni aıaqtaldy, dep habarlaıdy QazAqparat tilshisi.
Atalǵan týrdaǵy alǵashqy oıynda «Jetisý» men «Kaspıı» komandalary kezdesti. Match taǵdyryn aqtaýlyq klýbtan Shafık Tıgrýdja 18-mınýtta soqqan jalǵyz gol sheshti. Osylaısha «Kaspıı» syrt alańda 1:0 esebimen basym túsip, týrnır kestesindegi jaǵdaıyn jaqsarta tústi.
Taǵy bir kezdesýde «Aqtóbe» men «Atyraý» komandalary sheberlik baıqasty. Oıyn barysynda aqtóbelik klýbtan Boıan Dýbaııch 30-mınýtta mergendigimen kózge tústi. Jalǵyz gol «Aqtóbege» jeńis alyp keldi.
«Ordabasy» syrt alańda «Aqjaıyqtyń» osal tusyn tapty. Kezdesý taǵdyryn sheshken goldy 90-mınýtta shymkenttik komanda shabýylshysy Joao Paolo soqty. Osylaısha «Ordabasy» jeti oıynǵa sozylǵan sátsizdikter serııasyn toqtatty.
«Qyzyljar» komandasy syrt alańda «Shahterdi» 1:0 esebimen tize búktirdi. Goldy 90-mınýtta petropavldyq Rýslan Esimov soqty.
Atalǵan týrdaǵy qalǵan úsh oıyn 13 maýsymda ótkiziledi. Bul kúni «Taraz» ben «Qaırat», «Astana» men «Tobyl», 21.00-de «Qaısar» men «Turan» komandalary kezdesedi.
