Fýtboldan Qazaqstan chempıonaty: «Aqjaıyqty» jeńgen «Astana» kósh basyna kóterildi
ORAL. QazAqparat – Fýtboldan Qazaqstan chempıonatynyń 20-týrynda Oraldyń «Aqjaıyǵy» óz alańynda «Astana» klýbyn qabyldady, dep habarlaıdy QazAqparat tilshisi.
Eki aıdan astam ýaqytqa sozylǵan úzilisten keıin qaıta jalǵasqan birinshilikte elordalyqtar 41 upaımen «Tobyldan» keıin ekinshi orynda kele jatsa, alań ıeleri besinshi satyda edi.
Chempıondyq ataq úshin talasyp júrgen «Astana» komandasy 10-mınýtta esep ashty. Belorýstyq Maks Ebongtan pas alǵan reseılik Valerıı Chýperka «Aqjaıyqtyń» qaqpasyn qorǵaǵan ýkraınalyq Sergeı Lıtovchenkodan aılasyn asyryp ketti.
Budan keıin qos komandanyń gol soǵatyndaı múmkindikteri boldy. Keıbir sátte S.Lıtovchenko óz qaqpasyn aman alyp qaldy. Elordalyqtar da sátti qorǵana bildi.
Osylaısha 1:0 esebimen jeńiske jetken reseılik maman Andreı Tıhonovtyń shákirtteri 44 upaımen kósh basyna kóterildi. Degenmen 42 upaıy bar qostanaılyq «Tobyl» bul týrdaǵy oıynyn erteń óz alańynda Aqtaýdyń «Kaspııimen» ótkizedi.
El birinshiliginiń 21-týrynda «Aqjaıyq» 18 qyrkúıekte Taldyqorǵanda kósh sońyndaǵy «Jetisý» komandasymen kezdesedi. Al elordalyqtar «Aqtóbeni» qabyldaıdy.
Eske sala keteıik, budan buryn «Aqjaıyqtyń» «Aqtóbege» ese jibergenin jazǵan bolatynbyz.
Sondaı-aq búgin «Qyzyljar» «Qaısardan» basym tústi.
Sýretter – Aıbatyr NURASh
